No.7156/2020-2021

Vawiin khan Directorate of Science & Technology buatsaihin kum 2020 chhunga Mizoram hmun hranga hranga lirnghing chungchang zirchianna ‘2020 Earthquakes in Mizoram’ seminar Aijal Club-ah neih a ni.  He hun hi Planning (Science & Technology) Department Commissioner & Secretary Dr. C. Vanlalramsanga chu khuallian niin a hmanpui a ni.

Dr. C. Vanlalramsanga chuan kum 2020 chhung khan Mizoram hmun hrang hrangah lir a nghing a, a bik takin Mizoram khawchhak lamah a nghing na zual deuh a, thil a tihchhiat bakah mipui nunphung a ti buai hle a. Hetiang khuarel chhiatna hi pumpelh theih ni lo mah se mi thiam bikte ruahmannain a lo inven theih a, thuneitute thu awih hi khua leh tuite mawhphurhna a nih rualin mithiam te pawhin chiang leh chik zawk a chhiatna lo thleng thei hi zir chian a tul thu leh, vawiin seminar hian Mizoram sawrkar tana policy tha a hrin chhuah ngei a beisei thu a sawi a ni.

Seminar-ah hian  Pu F. Lalramchuana, Senior Scientific Officer, Directorate of Science & Technology-in Mizorama lirnghing lo awm tawh dan a sawi a; Pu Z.D. Laltanpuia, Senior Scientist, Mizoram Remote Sensing Application Centre-in Lirnghinga Mizoram hmun him leh him lo Science & Technology-in a lo chhui tawh dan a sawi a, Dr. C. Zoramthara, Assistant Professor & Head of Department, Department of Geology, Govt. Zirtiri Residential Science College-in India leh Burma inkar leilung chungril dinhmun leh insawi danglam dan a sawi bawk. Dr. Saitluanga, Associate Professor & Head of Department, Department of Geology, Pachhunga University College-in tunhnaia Mizoram khawchhak lama lirnghing an chhui chianna chanchin sawiin Pu H. Lalbiakkima, Jt. Director, Directorate of Geology & Mineral Resources-in Tuipuiral a lirnghingin chhiatna a thlen dan a sawi bawk a ni.

He hun hi Chief Scientific Officer Dr. RK Lallianthanga’n a kaihruai a. Seminar-ah hian leilung chanchin zirmi, khuarel chhiatna chungchanga  mithiam leh engineer – College, University leh sawrkar department atanga thlan bik ten sawihona hun tha tak an hmang a ni.