No.7155/2020-2021

Vawiin hian Pu K. Saitluanga, MIS, District Information & Public Relations Officer, Serchhip District chuan a pisa ah MJA Serchhip District Member te lengah sawmin kumthar thingpui in hona an nei.

Pu K. Saitluanga chuan, MJA member te kumthar chibai bukin, kumthar thingpui inho an buatsaih tlai deuh chhan te a sawifiah hmasa a. Kum kalta chhunga Serchhip District MJA member chhungkuaah harsatna lian leh chhiatna hial tawk an awm lo nia a hriat thu sawiin lawmawm a tih thu a sawi a ni. Kum kalta chhungin hripui vanga buaina karah thuthar thehdarhtuten fak tlakin sawrkar an thawhpui nia a hriat thu sawiin lawmthu a hrilh a. Kum thar lo herchhuakah pawh thawh hona tha tak te chhunzawm puiah a sawm bawk. DIPRO chuan kum kalta chhung khan I&PR Serchhip District chuan Press Release 368 an siam tih sawiin, Covid19 dona lama mipuite hriattirna lam a tam ber thu a sawi a. An Press Release te chu district chhunga Newspapers te leh Electronic Media ten kim takin an puanchhuah sak vek nia a hriat thu pawh tarlangin hei hian an thawh hona thatzia a tifiah nia a hriat thu a sawi a ni. Tin, DIPRO Pisa-ah inthlahrung hauh lova an mamawhte lam thin turin a chah bawk.

Pu Kapliana Pachuau, President, MJA Serchhip District pawhin thusawiin, I&PR Department chu nu leh pa anga an en a ni a, a tul ang zela thawhpui an inpeih reng tih a sawi a, department thahnemngaih puina zarah Serchhip District MJA pawhin Press Club hial te kan nei ta a, kan lawm hle a ni, a ti. Social Media lamah thu lengvak a tam thin avangin Journalist te tan sauh sauh tul nia a hriat thu sawiin, thudik zawn kawngah taihmak chhuah zel turin MJA members te a sawm nghal a ni.

Pu C. Ramengmawia, Vice President, MJA pawhin thusawiin, Serchhip district in DIPRO thawhpui nuam tak an nei nia a hriat thu a sawi a. Thuthar thehdarh leh mipuite thudik hrilhhriat kawnga hmasawn zelna tur nia a hriatte pawh a tarlang bawk 

Serchhip District ah hian MJA Member 14 an awm mek a ni.