3175/2022-2023
Aizawl, 5th January, 2023 : Mizoram Pollution Control Board chuan kum 2022, kumhlui thlah zân boruak dinhmun zir chianna a nei leh a, Sikulpuikawna Continuous/Automatic Air Quality Monitoring Station-in boruak dinhmun a chhinchhiah dân atanga a lan dânin kum 2022 kumhlui thlah zânah hâlpuah leh hâlmâwi hâlin kan boruak a tibawlhhlawh hlê a ni. Khâwlin a chhinchhiah dânin bawlhhlawh nâwi lêng vêl (PM10) hi December ni 31, 2022 chhun lamah chawhrualin 67µg/m3 a nih laiin zanlai dar 12-1 inkâr, hâlpuah hâl vânglaiah chuan 285µg/m3 a kai chho hial a ni. Kum kal tâ 2021, zanlai dar 12-1 inkârah 151µg/m3 a nih laiin kumin hian a lêt hnih dâwnin a sâng chho a ni.

Boruaka bawlhhlawh nâwi lêng zînga tê zual leh hlauhawm zual (PM2.5) pawh December ni 31, 2022 chhun lamah 17µg/m3 a nih laiin zanlai dar 12-1 inkâr, hâlpuah hâl vânglaiah chuan 67µg/m3 a kai chho hial a ni. Hâlpuah hâl vânglai hian chhun lam nen khaikhinin a lêt 3 aia sângin a pung chho tihna a ni.

Aizawl khaw chhûng tehna hmun dang, Khatla, Laipuitlang, Dawrpui leh Bawngkawnahte pawh kum dang aiin a sâng chho hlê a, Bawngkawnah 189µg/m3 leh Dawrpuiah 130µg/m3 lai kai chhoin kum hmasa 2021 aiin a sâng hlê a ni. Mizoram district khawpui dangahte pawh kum hmasa lam aiin a sâng chho deuh vek a, a sân lam erawh Aizawl ai chuan a zia vek a, 100µg/m3 thleng phâ an awm lo.

Hâlpuah hâl vâng hian boruak a bawlhhlawh phahin National Standards (pawm theih chin), 50µg/m3 a pêl nasa hlê a, Air Quality Index Stage 6 awmah Stage 4-na a kai pha hial a ni. Chuvângin hemi hun chhûng hian boruakah bawlhhlawh nâwi a lêng nasâ-in mihring tân a hlauhawm hlê tihna a nih chu!

Ri bengchhen dân pawh hemi zân hian hmun li, Bawngkawn, Laipuitlang, Dawrpui leh Khatlâ-ahte teh niin hâlpuah hâl vânglaiin hêng hmunahte hian chawhrualin ri rin zâwng hian 50dB a pêl vek a; a rin lai berin Bawngkawnah 104.7dB, Dawrpuiah 90.6dB, Laipuitlangah 100.9dB leh Khatlaah 90.7dB-te niin ri bengchhen phal chin, 45dB hi a pêl thui hlê hlawm a ni.