3176/2022-2023

Aizawl 5th January 2023: Vawiin khan Sinlung Hills Council hnuaia Suangpuilawna Tribal Hostel sak tur lungphum phumna hun chu Suangpuilawn Higher Secondary School tualzawlah neih a ni a. He hunah hian Assembly Speaker, Chalfilh bialtu MLA ni bawk Pu Lalrinliana Sailo chu khuallian niin, hostel lungphum hi a phum a ni.

Khuallian Pu Lalrinliana Sailo chuan Tribal Hostel sak tur chu quality ngaipawimawh chunga, tha leh tlo taka sak a nih a beisei thu a sawi a. Ram leh khawtlang hruaitute’n tum chiang tak kan neih a pawimawh a ni, a ti bawk. A chhehvel thila buai lova midangte thatna hmuhsak zel turin kalkhawmte chu chahin, Suangpuilawn khaw chanchinmawina chhunzawmtu ni zel turin a fuih a. Tribal Hostel chu Chalfilh bial leh tlangdung mipui ten tangkai taka an hman ngei theihnan duhsakna a hlan a ni.

Sinlung Hills Council-a Education changtu Executive Member Pu Ricky Lalremsanga pawhin thusawiin bialtu MLA leh state sawrkar hruaitute hmalakna zarah Chalfilh bialin hmasawnna hmel a hmu chho zel chu a lawmawm takzet a ni, a ti a. Bial mipuite chu midangte thil tih that hmuhsak zel turin a ngen nghal bawk.

Tribal Hostel hi Ministry of Tribal Affairs hnuaiah cheng nuai 328 hmanga sak tura ruahman a ni a, first instalment cheng nuai 70 pek chhuah tawh a ni.

Lungphum phumna program hi Suangpuilawn VCP Pu Lalnunchanga’n a kaihruai a. Pu David Sapzova, SE, PWD leh Pu J.Rokima, Additioonal SP, Saitual District ten an telpui bawk a ni.