3177/2022-2023

Aizawl 5th January 2023: Public Health Engineering (PHE) Department chuan an department hnuaia Assistant Engineer (AE)/ Sub-Divisional Officer (SDO) chin chunglamte ko khawmin kum kaltaa an hnathawh thlirletna leh an hnathawh mek leh hmachhawp atana inbuatsaih nan ni hnih awh Review Meeting an nei a. Vawiin chawhma khan Multipurpose Hall, Berawtlangah hawnna hun neih niin Deputy Chief Minister Pu Tawnluia chu khuallian a ni.

Pu Tawnluia chuan Mizoram hmun hrang hrang atanga kalkhawm PHE hotuten ram mipui te tana hlawk zawk leh chak zawka hna an thawh theihna tura kum tir tea infuihtharna hun an buatsaih chu lawmawm a tih thu a sawi a. PHED chu an mawhphurhna a sang a, mipui pawhin anmahniah beiseina sang tak an nei tih sawiin he infuihtharna leh an hnathawh mek leh hmachhawp thlir lawkna hun an hman turah hian Department in hma an sawn theihna turin taima taka sawihona leh thil tha an hriat te inhrilhhriat tawnna hlawk taka hmang turin a fuih a ni. Deputy Chief Minister chuan PHE chu engineer te thiamna hmanga mipuite tui thianghlim in tur ngaihtuah tu, faina leh thianghlimna kawnga hma la tu leh bawlhhlawh sawngbawl thleng pawha khawihtute an nih avangin Mizoram mipuite tan an hnathawh hi a pawimawh tak zet a ni, a ti a. Scheme hrang hrang an khawih zingah kum rei vaklo atang khan Mizoram khaw tin, in tina mahni inchhung ngeia tui an dawn theihna tur Jal Jeevan Misssion lian taka kalpui leh mek a ni tih a sawi a. Thawktu indaihlohna karah an hna a pung zel a, chutichungin thawktuten an mawhphurhna tha taka an kengkawh theih chu lawmawm a tih thu leh achievement pawimawh tak tak an neih mek thu he hunah hian Pu Tawnluia chuan a sawi a ni. 

PHE hian Mizoram puma household 1,34,028 awm mekah 97,079 hnenah tui thianghlim in tur an pechhuak thei tawh a. Hei hi za zelah 72 vel tling tawhin an hmabak chhungkaw 36,949 tuam chhuah tumin chak takin hma an la chhunzawm mek a, kumin July thla hian Mizoram chhunga household zawng zawngah tui connection hi pek chhuah vek an tum a ni. Jal Jeevan Mission hnuaiah Mizorama khua leh khaw per awm zawng zawng belhkhawm 742 -a 333 ah he scheme hi hlawhtling takin an kalpui tawh a. A bak 515 ah hmalakna a kal mek a. JJM hnuaiah scheme 848 kalpui niin hemi hnuaia scheme 26 atan State Level Sanction Committee a thu tawh a, Sawrkar Laipui pawmpuina nghah mek a ni bawk. 

Review Meeting hawnna inkhawm hi PHED Secretary Er.C.Lalremsiama’n a kaihhruai a. Mizoram pum huapa PHED hmalakna langsar zual sawina hun a hmang. Chawhnu lamah Technical Session neih chhunzawm nghal a ni.