2514/2024-2025

Saitual the 14th October, 2024: Vawiin khan kum 2024 Krismas leh 2025 kumthar lo thleng tur lawm dan tur leh mitinte’n hlim leh lawm taka hun an hman theih nan hmalak zui dan turte sawiin All NGO hruaitute, DC Conference Room-ah an thukhawm a, he thutkhawmna hi Dr Lalngura Tlau Bawrhsap chuan a kaihruai a ni. 

Hun kaihruaitu Dr. Lalngura Tlau chuan kalkhawmte hnenah lawmthu sawiin sawrkar phalloh thil inzirtirna kawngah mipuite hnena awareness neih nasat lehzual a tul thu sawiin mahni veng tin area theuhah sawrkar phal loh thil tih a that lohzia inzirtirna nei theuh turin a chah a, inkhap beh aiin rilru inhnehsak hmasak a pawimawh thu a sawi bawk. NGO leh khawtlang aiawha duty te pawhin zawldawh taka midangte ti na lo zawng a duty hram turte, hlim leh lawm taka mipuiten he hun hi an hman theih nan fimkhur lehzual turte, sawrkar phalloh thil tilui lo turin a chah bawk.

Vawiin thukhawmah hian kum 2024 Krismas leh 2025 Kumthar lo thleng tur atan hian mipuiten thlamuang tak leh hlim taka hun an hman theih nan halpuah, halmawi leh puak thei thil lam chi reng reng kum dang zawng aia khauh zawka  khap tur ta hmalak rel niin, District Administrators, SP Office leh khawtlang hruaitute, All Ngo te nen tangrual a, theihtawp chhuah an rel a ni. Hetih rual hian kalkhawmte chuan Saitual Town Area chhunga VC Area 9 te tan, vengchhung/kawn cheimawia intihsiakna neih an rel a, chu chuan vengchhung leh mimal compound te pawh huam telin endikna kalpui tura rel a ni bawk. 

Vawiin All NGO thutkhawmah hian District bawrhsap Dr Lalngura Tlau bakah Pu Gaurav Tyagi, SP Saitual, Pu J Rokima Addl SP, Pi Christina Lalnunfeli, SDC leh tlawmngai pawl hrang hrang aiawhte an tel kim a ni.