Kumin 2009 hian Mizoram-ah Sikserh vanga thi an pung nasa hle. Tunlai ruah sur zeuh zeuh leh nisa in boruak hnawng a siam a, he khaw lum leh hnawng inchawhpawlh hi thosi inthlahpunna atana duhthusam a nih avangin thosi a pung duh hle a, thosi a tam chuan Malaria pawh a tam thin. Kumin Jan - May thleng Sikserh vanga thi mi 44 lai an awm tawh avangin Sikserh laka inven hi mipuite’n ngaipawimawhin khawsik, Sikserh vei nia inringhlel chuan mahni veng emaw khua a FTD/ASHA/ Sub-Centre pan vat in, a thlawnin thisen exam tir tur a ni. Sikserh veite’n Malaria damdawi an ei ngei tur a ni. Sikserh vanga thi te hi mahni inenkawl har vanga thi an ni tlangpui.

Sikserh do nan DDT Second Round kah mek a ni a, kah tura thlan bik khua-ah te hian ngun taka DDT lo kahtirin mahni inchhung, a bik takin mut pindante kah tir vek tur a ni. DDT hian thosi banga bet a tihhlum avangin zan laia thosi min sehtuturte lakah mi a veng thin. Kum dang anga Mizoram pumpuia DDT kap tawh lovin, Sikserh tamna khuaah te chauh DDT hi kumin April atang khan kah tan a ni. DDT hi thla thum chhung daih tura ngaih a ni. Hemi bakah hian Sub-Centre-ah, office hun chhungin thosilen damdawi in a chiahtir theih a, zan mutna-ah thosilen zar tur a ni.

Kum 2005- 2009 (Jan - May) thleng Malaria vanga thi zat hetiang hi a ni:

Year        Malaria Positive            Malaria PF        Thi zat

2005        2390                    1276            38
2006        2225                    1401            38
2007        1192                    754            38
2008        1220                    909            11
2009        1810                    1308            44