Vawiin khan NLUP Apex Board chuan Chairman, Pu Lal Thanhawla Chief Minister hovin NLUP Implementing Board conference hall-ah Apex Board meeting vawi 14-na leh, kum 5 chhung atana a hnuhnung ber tur an nei a. NLUP hnuai hmalakna hrang hrang te leh heng atanga hmasawnna dinhmun te thlir hovin NLUP kalpui chhunzawmna tura thil pawimawh te an ngaihtuah ho a ni.

Chief Minister Pu Lal Thanhawla chuan “NLUP chu mirethei kut hnathawktu ten mi hausa leh thil tithei zawkte tlawn ngai lova, mahni kutkea an din ve theihna tura Pathian programme a nih avangin titawp tura theihtawpa beihna leh hekna nasa tak tawk mah se, project kalpui chhunzawm zel tura sum mamawh zat chiah central sorkarin a rawn pe a, kalpui chhunzawm zel a ni ang,” a ti.

Chief Minister chuan ei leh bar leh ram chhung atanga sum thawh chhuah ah Mizoram dinhmun chu a chhuanawm lo, tiin kum khata thla 12 ah ram chhung thar chhuah chu thla 3 ei chauh a ni a; kum khat atana state sum mamawh chu vaibelchhe sang nga leh sang ruk vel inkar a nih laiin vaibelchhe 300 awrh chauh state in a thawh ve thei a. Mizoram dinhmun chawikang a, malsawmna tam tak tawng baw turin ram leilung leh leihnuai hausakna hai chhuak tur te, thenawm ramte nena insumdawn tawnna kawngah te nasa zawka tan lak a tul hle a ni, a ti a. NLUP chu state dinhmun chawikan nan hmanraw pawimawh tak pakhat a ni, tiin kalpui tawh atanga siam that ngai te siam tha a, tha zawka kalpui chhunzawm turin member te chu tlang taka ngaihdan sawiho puiah a sawm a ni.

Agriculture department enkawltu leh NLUP Nodal Minister Pu R.Lalzirliana chuan NLUP chu awmlo atanga awma lo indin, a taka ti puitling tura kalkawng thui tak a nih dan sawiin kum 5 chhung kalpui tawh chinah NLUP chuan Zoram hmun kilkhawr ber thlengin hmasawnna a thlen mek a ni, a ti a. Central sorkar-in NLUP kalpuina tur sum a rawn pek bakah he project hian central scheme hrang hranga Mizoram sum hmuh pawh nasa takin a tipung a. Central sorkar leh UNO ten NLUP chu an tuipui avangin he project hian hmalakna tur dang tam tak a hrin belh mek a ni, a ti a. Kum 5 chhung tluang taka kalpui a nih theihna chu a enkawltu line department te, district hrang hranga D.C te leh NLUP atana thawktu hrang hrangte inpekna leh thawhrimna vang a ni, a ti a. Sorkar department pawn lam atangin kohhran leh tlawmngai pawl hrang hrang te, Mizoram University leh Media ten sorkar flagship programme hmanga Zoram thar siamna atan an theihna leh thiamna te nasa takin an thawh bawk a ni, tiin NLUP hlawhtlinna tura thawktu zawng zawng te chungah lawmthu a sawi.

Vawiin Apex Board meeting ah hian kum 5 chhunga NLUP kalpui dan tlangpui leh kum 2014-15 atana NLUP sum ruahmanna thlir ho a ni a. NLUP kalpui chhunzawmna tura ruahmanna hrang hrang- UN Agencies te nena thawh hona tur te, thil deh chhuah hralhna tur market chungchang te, NLUP Phase II kalpui chhunzawmna tur leh hemi hnuaia beneficiary 15,000 dang tanpuina tur te, Funding Agencies dang pahnih, North East Region Livelihood Project(NERLP) leh Tata Trust Fund under Corporate Social Responsibility(CSR)te thawhpuina kawng dap dan chungchang te, Skill development atana hmalakna tur te, NLUP hnuaia hmalakna chhuanawm bik leh chhenfakawm tanpuina pek dan tur chungchang te, Horticulture department hnuaia thlai chi leh hmanraw sem dan tur chungchanga ruahmanna siam te bakah NLUP hmalakna enpui tura State Planning Board mawhphurhna pek chungchang te thlir hovin zau taka sawiho a ni.

Vawiin meeting ah hian line department 9 ten kum 5 chhunga an hmalakna leh hmasawnna te, harsatna tawh leh tuna an dinhmun tlangpui theuh te tarlangin presentation an pe a. A pumpuia NLUP dinhmun tlangpui tarlangin NIB Vice Chairman Pu P.L.Thanga’n report a pe a. Consultative Committee on NLUP member pahnih- Dr. Robert Halliday leh Pu Zion Lalremruata ten Marketing leh Safe farming- Israel model chungchang ah presentation an pe bawk a ni.

Vawiin Apex Board meeting ah hian kum 5 chhung thahnemngai taka NLUP kalpui leh enkawltu Line department 9 te hnenah chawimawina, Certificate of Appreciation, Pi Lal Riliani, President, Indian Society on Tobacco & Health, Mizoram Chapter-in a hlan a. Chief Secretary Pu Lalmalsawma IAS in lawmthu sawiin meeting hun hnung a khar a ni.