Home Minister Pu R. Lalzirliana chuan Mizoram Police Sports Meet vawi 16 na, Rajiv Gandhi Indoor Stadium Mualpuia neih kharna programme chu vawiin tlai dar 3:00 khan a hmanpui. Police Department hnuaia March past parade Contigent hrang hrangte chibai bukna chhangletin Home Minister chuan infiamna hrang hranga ti thate hnenah lawmman a sem nghal a ni.

Mizoramah Police dinna a rei tawh a, hminghliauna leh sawiselna pawh a pumpelh bik lo a ni tiin khuallian Pu Lalzirliana chuan sorkar chuan hei hi ti reh mekin police te hnathawh dik tak mipui ten hria in an thlamuanpui tawh tak zet a ni, a ti a. Mizoram hmun hrang hrangah Police Out Post leh Beat Post te mipuiin an rawn dil a. Sum indaih lohna avangin duh anga puitlin vek erawh a har thu a sawi. Chutih ruala Police te hnathawh leh thawm a thangmawi chho tan chu a lawmawm a tih thu sawiin Discipline-ah erawh inenfiah a ngaih thu sawiin Police dulkiar te pawh an hriselna leh an hmakhua a tan training tir dan ngaihtuah a tul thu a sawi bawk.

Home Minister chuan Mizoram hmasawnna tura hmalak dan sawiin Central Sorkar Scheme atanga cover theih loh Deficit Aided School leh Private School 57 tan sanction Rs. nuai 1500 zet hmuh tawh a niin 26 sak zawh tawh anih thu leh 31 te sak lehna tur Rs. nuai 1254 sak lehna tur Ministry of Human Resource Development, Govt. of India chuan a rawn pawm sak tawhin an rawn sanction thuai dawn a ni a ti a. Mizoram hi India ramah he scheme hnuaia hmala tha ber leh Northeast ah pawh sum hmu tam ber anih thu a sawi.

Home Department hmalakna hrang hrang pawh sawiin 3rd IR Battalion Thingkah atan Rs. nuai 2842.28 hmuh tur ah Rs. nuai 1023 hmuh tawh a ni a, tunah hian kawnglaih leh building chi hrang hrang sak zui nan hman a ni. Police Hq. Khatla sak that nan Rs. nuai 1550 hmuh turah Rs. nuai 560.08 hmuh tawh a ni a. Women Jail, North East a a hmasa ber turin project siam a ni a. Rs. nuai 1306.95 hmuh a ni a. Rs. nuai 1176.25 dawn tawh a niin sak tan mai tur a ni. Heng bakah hian Traffic SP Office Rs. nuai 500 a New Secretariat Complex a sak tur te, Fire Service lam tih chakna tura rs. nuai 1000 pawm tawh anih thu leh Police Hostel-cum-Centre atana Rs. nuai 381.50 Ministry of Tribal Affairs atang hmuh hmangin Mualpuiah sak mek anih thu a sawi a. Chhingchhip khuaah Sainik School sakna atan NLCPR atangin Rs. nuai 5064.23 leh 13th Finance Commission atangin Rs. nuai 5000 ruahman a ni. NLCPR atang hian Rs. nuai 3773.35 hmun tawh a ni a, 3rd Installment pawh beisei leh mek a ni. Govt. of India, Ministry of Finance pawhin 13th Finance Commission hnuaiah Rs. nuai 2500 an rawn sanction tawh bawk. Heng bakah hian Home Minister chuahn DPR lian tham tak tak buatsaih leh mek a niin Mizoram Police hnuaiah building revolution a thleng tan mek a ni a ti.