Vawiin khan State Guest House, Aizawlah National Commission for Women, New Delhi member Pi Laldingliani Sailo hovin hmeichhiate hmasawnna tura eizawnna tlak thiam thil an neih theih na tur 'Consultation meeting for formulation of skill development for the empowerment of women' neih a ni a. Hetah hian Mizoram State Commission for Women Chairperson Pi Vanlalawmpuii Chawngthu bakah National Commission for Women, New Delhi a Senior Research Officer Pi Richa Ojha, Persons With Disabilities Commissioner Pi B Sairengpuii leh mi pawimawh dangte an tel a ni.

MSCW Member Dr Lalrindiki Fanai kaihhruai he meeting-ah hian Khuallian Pi Laldingliani Sailo chuan National Commission for Women (NCW) chu NCW Act 1990 tlawhchhana hmeichhiate chawikanna, hmasawnna, himna leh zahawmna humhim tura kawng hrang hranga hmalatu pawimawh tak a nih dante a sawifiah a. India hmarchhaka state tinah hmeichhiate dinhmun dik tak zirchianna survey uluk taka kalpui mek a nih dan sawiin he report atang hian Mizo hmeichhiate hi eng dinhmunah nge an din tih te, hmeichhiate chawikan nana sorkar laipui hmalakna hrang hrang chuan an hnen a thleng pha em tih te, heng hamthatnate hi an lo chhawr tangkai lo a nih chuan eng nge a chhan tih leh an chhawr tangkai ngei theihna tura tih tur tulte a hriat chian lehzual theih dawn a ni, a ti. Pi Laldingliani Sailo chuan Mizoram Sorkarin dan thar ‘The Mizo Marriage Divorce Inheritance of Property Act 2014’ a siam chu Mizo hmeichhiate tan bung thar chhinchhiahtlak leh pawimawh tak a ni a, he dan chhawrtu tur Mizo hmeichhiate chu NCW chuan a lawmpui tak zet a ni, a ti. Mizo hmeichhiate’n an dikna chanvo an hriata, he dan hi an chhawr tangkai theuh theih nan puanzar leh inhrilhriatna kawngah tan la turin a fuih bawk. Pi Laldingliani Sailo chuan hmun hrang hrang an fankualna atanga Mizo hmeichhe tam takin mahni inchhungkhur atanga sum an dehchhuah dan a hmuh thu sawiin hei hi uar zawka kalpui zel tha a tih thu leh mahni kea ding thei tura hmeichhiate tihchakna hmanraw tangkai nia a ngaih thu a sawi bawk a ni.

Pi Vanlalawmpuii Chawngthu pawhin thu sawiin Mizoram Sorkarin hmeichhiate hamthatna tur dan thar tha tak a siam chuan hmeichhiate chawikanna a ngaih pawimawhzia a ti lang a ni, tiin hmeichhiate chawikanna tura thawktu National Commission for Women-ah Mizo nu ngei member a ni chu chhuanawm a tih thu a sawilang bawk.

He meeting-ah hian Dr Lalthansangi chuan Basic Survey an kalpui dan a sawifiah a, Mizoram Law Commission Member Secretary Pu Zahmingthanga Ralte chuan The Mizo Marriage Divorce Inheritance of Property Act 2014 a sawifiah a, State Nodal Officer on Human Trafficking Pu Joseph Lalchhuana chuan ‘Human Trafficking in Mizoram’ tih a sawifiah bawk.

Consultation ah hian Mizo hmeichhe pawl hrang hrang bakah tlawmngai pawl hrang hrang te an tel a ni.