State Election Commission of Mizoram thupek angin Revision of Electoral Roll of Local Councils 2015 chu zawhfel a ni a, Local Council Final Electoral Roll, Aizawl District vawiin khan tarchhuah a ni ta.

Aizawl District-ah hian Local Council Constituency 83 a awm a, MLA Electoral Roll behchhanin Draft Electoral Roll hi ni 16.2.2015 khan mipuite entheih turin tarchhuah a ni a, ni 23.2.2015 thleng khan Electoral Roll atanga paih ngaite leh siksawi rem ngai te chu bialtu MERO, AMERO leh Locality Level Officer (LLO) ten buaipuiin Locality Level Standing Committee (recognized Political Party aiawh leh NGOs ( MUP, MHIP, YMA ) aiawh) te nen an enfel a, heng hi District Municipal Election Officer hnenah thehlutin DMEO kaihhruaina hnuaiah Asst. District Municipal Election Officer leh Staff ten a tul angin an thawk zui char char a ni. Tun tum revision ah hian Local Council Constituency pahnih (2) Tlangnuam Vengthar leh Khatla East te Electoral Roll tur chu a hranga siam rem a ni a. Hun a chep a vangin State Election Commission, Mizoram thuchhuak angin hming thunluh belh a ni lo.

Local Council Electoral Roll ah a zavai a voters awmzat chu 192382 a ni a, mipa 90,287 leh hmeichhia 102095 te an ni.

Voters tlemna ber Chite Local Council-ah voters 362 awmin mipa 192 leh hmeichhia 170 an awm a; Voters tamna ber Zemabawk Local Council-ah voters 5902 an awm a, mipa 2905 leh hmeichhia 2997 an awm.

Revision of Local Council Electoral Rolls, 2015 tluang tak leh hlawhtling taka neih theih nana rim tak leh thahnemngai taka thawktu, MERO, AMERO, Locality Level Officers (LLOs), Local Council hrang hrangte, Political Party te leh NGO hrang hrang te, Media te leh Sawrkar Department’ hrang hrang te hnenah Aizawl DC chuan lawmthu a sawi a ni.