“Education Dept. hian kan ram tan enge a thawhchhuah tih aiin Education Dept. hian enge a tih loh tih hi mite min thlir dan a ni” tih School Education Parliamentary Secretary Pu Joseph Lalhimpuia chuan a sawi. He thu hi vawiina Mizoram Education Inspecting Officers Association General Conference, Heritage Palace, Falkland-a neih a hmanpuinaah a sawi a. Hemi avang hian thawktute tan fimkhur a ngai hle a ni, a ti. Education Department-in kan rama mithiam tam tak a chher chhuah avanga hnathawh ropui tak tak hmuh tur lo awm ta te, Infrastructure tam tak din a lo ni ta te hi heng thawk thei tur Education Department-in mithiam a chherchhuah vang a ni tih mipuiten min hriatpui se a duh thu a sawi bawk.

Parliamentary Secretary chuan Education Dept. ah hian sum leh pai harsa tak karah tun hnai khan zirtirtu thahnem tak Selection Grade a kaite an arear nen lam tihfelsak an ni a ti a. Kuminah sum leh paia harsatna sawi uar ber kumah February thla thleng hlawh tur LOC pek chhuah tawh a ni a, hei hian Contract a thawk te pawh a huam vek a, hei hi Education Department-ah kumdanga la awm ngai lo a ni a ti a. Sum leh pai harsa tak chung pawha zirtirtu hlawh daih tur sum leh pai min pe te hi Chief Minister-in zirna a ngaih pawimawh vang a ni a, a lawmawm hle a ni a ti. Education Dept. officer kalkhawmte chu thawhhona tha tak nen thahnemngai leh zuala an hma zawna thawk theuh turin a fuih bawk.

MEIOA hian kum 2015-17 chhunga an pawl hruaitu tur an thlang a. President ah Pu K.Lalrintluanga, Vice President-ah Pu R.Laldangliana Dy Director, General Secretary-ah Pi Zoliani Hnamte DPC SSA Aizawl Dist. Asst. Secretary-ah Pu R.Lalthanmawia SDEO Darlawn, Treasurer-ah Pi Lallianzuali Bawitlung SDEO Aizawl South, Financial Secy-ah Pu Lalchungnunga Dy Director(H) te an thlang a, MEIOA ah hian member 41 an awm a ni.