2589/2023-2024

Hnahthial the 1st November 2023: Kumin MLA inthlanpui neih turah Election Commission of India ruahmanna angin vawiin khan Hnahthial District 29-South Tuipui Assembly Constituency a inlama vote thlak tur te; Absentee Voters-Senior Citizens (AVSC), kum sawmriat (80) chung lam voter-te leh Absentee Voters-Persons with Disabilities (AVPD) te chuan vote an thlak tan theih nan polling official-te an thawkchhuak tan.

Polling official-te hi Hnahthial khawpui chhung, Tuipui ral leh Tuichang ral bialah te then niin, vawiin chawhma dar 10:00 khan District Election Officer Pu Chuauhnuna, District Bawrhsap ni bawk chuan DC Office tual atangn a vailiam a ni. Polling Official-te hi an area theuhah Booth Level Officer (BLO) ten lo tawiawmin Absentee Voters Senior Citizens (AVSC), kum sawmriat (80) chung lam voter-te leh Absentee Voters Persons with Disabilities (AVPD) awmnaah an hruai zel dawn a ni.

Hnahthial District 29-South Tuipui Assembly Constituency huam chhungah hian in lama vote thlak dil kum sawm riat (80) chung lam (AVSC) mi sawmnga (50) leh pian phunga rualban lo (AVPD) mi pathum an awm a ni. Kum upa leh rualbanlo in lama vote thlak dil te hi Khawhri; Thingsai, Darzo, Muallianpui, S. Vanlaiphai leh Hnahthial-ah te an awm a ni.