2590/2023-2024

Aizawl, the 1st November, 2023: CEO Office, Mizoram hmalaknain vawiin chawhnu dar 1:00 khan Mizoram Legislative Assembly House Annexe Conference Hall-ah Addl. Chief Electoral Officer Pu H.Lianzela hovin Official-te tana Postal Ballot hmanga vote thlak dilna leh vote thlakna tur Pre-Polled Postal Ballot Paper inhlantawnna hun ‘Exchange of Postal Ballot Papers’ District hrang hrang 11 te'n an nei.

He hun hmanpuitu Addl. CEO Pu H.Lianzela chuan ECI duhdan angin mipuite rinngam leh innghahnatlak ni tura langtlang leh him taka election buaipui a pawimawh thu sawiin, mawhphurhna theuhte tha taka hlen tura theihtawp chhuahho zel a tul a ni, a ti a. Postal Ballot hmanga vote thlak chu ngaihpawimawh a nih thu leh hemi kaltlanga hmalaknate fimkhur taka kalpui a tul thu sawiin, langtlang leh rinna nghah ngam a nih theih nan Political party-te hriatpuina leh security-te venhimna hnuaiah uluk taka Postal Ballot Paper inhlantawnna hi neih thin a ni, a ti a. Tih sual palh leh hmaih palh a awm loh nana fimkhur tlan a pawimawh thu a sawi bawk.

Pu H.Lianzela chuan inthlan ni November ni 7, 2023 chu Dry Day-ah Sawrkarin a puan thu sawiin, he thu hi zawma zu leh ruihhlo dangte chelek lo turin mipuite a ngen a. Kalkhawmte chu Polling Area-ah rui buai an awm loh nan te, vote thlak tibuai leh tikhaihlak zawnga chetlakna a awm loh nana inzirtirna nei tam turtein a chah a. Boruak muanawm tak hnuaiah tlai dar 4 a vote thlak zawhfel hman a nih theih nana mipuite zirtirna pe tam deuh deuh turin a chah bawk a. November ni 5, 2023 Pathianni tlai dar 4 atangin inthlan kaihhnawih campaign lam hawi hrim hrim khap a nih tawh dawn thu leh silent period hman tan a nih dawn thu a sawi a. Campaigner zawng zawngte'n an vote neihna hmun an pan a ngaih tawh dawn thu leh Electronic Media kaltlanga politics kaihhnawih chhuah phal a nih tawh dawn loh thu a sawi a. Print Media tan silent period bikah Political Advertisement chhuah tura MCMC ah dilna thlen hmasak a tul tawh dawn thu a tarlang bawk. Kalkhawmte chu 2018 inthlanpui voter turnout 81.11% khuma 83% thlengpha thei tura theihtawp chhuah turin a chah a. Hmabak la awmte rintlak leh rinngam ni chunga hlen chhuah zel tum turin a chah nghal bawk.

He hun hi Pu R.Vanrengpuia, Dy. CEO Mizoram chuan kaihruaiin District hrang hrangte'n Form 12, Form 12D leh vote thlakna tur Pre-Polled Postal Ballot Paper inhlantawnna hun a tahtawl zelin an nei a. Inthlan kaihhnawih duty-te bakah essential services duty tur mahni veng/khua a vote thlak hman lote chuan Form 12 hmangin Postal Ballot hmanga vote thlak an dil a, 12D hmnagin absentees voter ten home voting an dil bawk a; vawiin hian dilna form leh vote thlakna tur Postal Ballot-te inhlantawnna hun hman a ni.

He hunah hian District hrang hranga Postal Ballot buaipuitute bakah Political party aiawhte leh Security personnel-te an tel a. Hun hman zawh a nih hnu hian tlai khawmuang lovin mahni District theuh venhimna khauh tak hnuaiah an pan leh nghal a ni.