No.2428/2021-2022

Aizawl 1st October 2021 : Vawiin khan Lunglei District Elder Helpline Authority te chu District Magistrate Pu Kulothungan A, IAS hovin a pisaah an thukhawm a, khua leh tui kum upa zawkte tana Helpline kalpui meka District hmalakna tur awm theite leh Service Offices (Line Department) ten lo inbuatsaihna an mamawh awm thei ang chite an sawi ho.

Ministry of Social Justice & Empowerment, Government of India chuan kum upa zawk (Senior Citizen) a mamawhtu apiangte tana Elder Line a duang a, a number chu 14567 a ni. Mizoramah pawh kalpui tawh niin Lunglei District-ah Vanlalthangzuali (8413879341) chu Field Response Officer a ni. A mamawhtu apiangte tan 14567 hi nitin zing dar 8 atanga zan dar 8 thleng a thlawna (toll free) biak pawh theih niin Mizo tawng leh English a biak theih an ni.

District Magistrate Pu Kulothungan A chuan Elder Line 14567 chu a mamawh ten an hman tangkai theihnan leh kum upa zawk harsatna neite tanpui ngei an nih theihnan Line Department-te theihtawp chhuah turin a chah a. Line Department-te bakah Mizo Upa Pawl (MUP) leh tlawmngai pawl dangte nen pawh tanghova inrawnkhawmna buatsaih kawnga hma la turin Field Response Officer chu a hriat tir bawk a ni.

He helpline in a tum ber chu India khua leh tui dik tak kum 60 chunglam ten hrisel taka an nun hlim leh zalen taka an hman theih nan a ni a, sawrkar, NGO leh mithiamte kaltlanga an harsatna chiang taka hriapui leh tanpui an ngaihna zawn apianga tanpui a tum a ni. Sawrkar scheme hrang hrang an hriat duhte, sawrkar hmalaknaa zawhna an neihte, lungawilohna an neih te a thlenna tur hmun dap sakte chu a ngai pawimawh hle a ni. Tin, an hriselna atana an hriattur thil te, tar chawmna thilte, nitin nuna an mamawh hrilhhriatte, Dan leh a kaihhnawih thil ah te, an mimal buaina dang chinfel sak kawngah te, sum leh pai leh an pension thila hriat duh an neih te, tihduhdahna tuarte chhawmdawl te, enkawltu neilote awm zel dan tur dap puite, an taksa mamawh dappui leh rilru lama harsatna an neih leh tanpui an ngaihna kawng tinrenga lo tanpui daan dappui kha he helpline hian a bawhzui pui thin dawn a ni.

Kum upaten Helpline kaltlanga an mamawh an thlente district lama a tul anga lo bawhzui nghal zel tur Services Office te vawiin hian an thukhawm a, chungte chu District Social Welfare Office te, Police Department te, Health Department te, District & Sub-divisional Magistrate te, leh District Legal Service Authority te an ni a. Tin dan lam thila harsatna nei apiangte tan District Legal Service Authority kaltlanga tanpui theih an ni bawk. Helpline hian mamawh neia anmahni be pawptute chu Field Response Office leh Services Office te nena tangrualin an mamawhte a dap sak thin dawn a ni.