Nimin tlai khan DC Conference Hall, Mamit-ah Pu Vanlalngaihsaka, District Election Officer kaihruaina-in Mamit District chhunga Political Party hrang hrang te leh Tlawmngai Pawl hrang hrangte hnenah kumin Inthlanpui kan hmachhawn tura inbuatsaihna leh hmalak tawhna hrang hrangte inhrilhhriatna neih a ni.

Pu Vanlalngaihsaka District Election Officer chuan kan hma-a inthlanpui kan hmachhawn tur atan inthlanna felfai leh thianghlim a awm theihna turin Political Party hrang hrangte leh tlawmngai pawl te pawimawhna a tarlang a. Kan aiawha ram rorelna hna thawk tur kan thlanna turah inthlanna felfai leh dik siam tura tan la theuh turin a sawm. Pink Polling station hmeichhe tan chauh vote thlakna tur buatsaih a nih tur thu tarlangin Mamit District chhungah Polling station hi avaiin 116 a awm tur thu a tarlang bawk.

Pu Jacob Lalawmpuia, Addl. DC Mamit chuan Smart Phone hmanga Complaint thehluhna; eVigil chu mipui tam zawkin an hmelhriata an hman tangkai thiam a pawimawh thu a tarlang bawk.

He hunah hian Mamit District chhunga Political Party hrang hrang aiawh te leh tlawmngai pawl hrang hrang aiawhte, Election Officials te bakah thutharthehdarhtute an tel a ni.