No.1012/2020-2020

Aizawl, the 12th May 2020 : Vawiin khan State Election Commission kaihhruaina hnuaiah CYMA Hall, Tuikhuahtlangah kumina Aizawl Municipal Corporation inthlanna neih tur atan Ram Danpui in hmeichhia te tana ram leh tualchhung inrelbawlnaah seat awm atanga za zelah 33 a zuahsak (reserved) thlanna neih a ni a. Hmeichhia te tana AMC a Seat 6 hausak tur vawiina pawh te chu – Ward III, Ward VIII, Ward X, Ward XIV, Ward XVI leh Ward XIX te an ni.

State Election Commission a, Commissioner thar, March ni 2, 2020 a a hna zawm Pu Laima Chozah, IAS (Rtd.) chuan Ram Danpui leh Mizoram Municipalities Act 2007 hnuaia ram leh tualchhung inrelbawlnaa hmeichhia ten chanvo zau zawk an neih theih nana an tana seat hauhsak reserved dan tlangpui a sawi a. SEC chu Ram Danpui hnuaia din constitutional body an nih angin hma lakna leh ruahmanna reng reng mipui hriat tur chu felfai leh langtlang taka an tih thin avangin vawiina Hmeichhia te tana Seat Reserved tur thlannaah pawh tlawmngai pawl hrang hrang hruaitute chu an thlan dan hriatpui turin an sawm niin a sawi a. COVID-19 hri lengin ram a tih buai vangin Inthlan hun tur hi sawi lawk theih ni lo mahse Hmeichhia te tana seat zuahsak thlanna chu a dan pangngaia tih a tul avangin vawiina hun hi buatsaih a nih thu a sawi bawk a ni.

SEC Secretary Pi Teresy Vanlalhruaii chuan kum 2010 leh 2015 a AMC Inthlannaa Hmeichhia te tana Seat Reserved thlan dan tlangpui a sawi a. AMC Ward 19 awm atangin Ward 7( Ward III, Ward V, Ward VIII, Ward X, Ward XIV, Ward XVI leh Ward XIX) tun thlenga hmeichhia te tana la reserved lo atanga Ward 6 thlan dan tur ruahmanna an siam chu political party leh tlawmngai pawl aiawh pakhat theuh kalkhawm hmaah a sawi a. Hemi hnu hian Ward 7 atanga Ward 6 te chu MHIP leh MUP President te, Aizawl DC, Joint Secretary UD&PA, Municipal Commissioner, AMC leh Deputy Secretary GAD ten Ward hming 7 ziah lawksa atangin an pawt a ni.

Kumina AMC Inthlanna atana Hmeichhia te chauhin an chuh theih tur Municipal Ward 6 te chu

1. Ward III – Ramhlun North, Ramhlun Venglai, Ramhlun Vengthar, Ramhlun Sports Complex leh Laipuitlang
2. Ward VIII – Armed Veng, Armed Veng South leh Chite
3. Ward X – Chawnpui, Zotlang, Zonuam leh Govt. Complex
4. Ward XIV – Khatla, Khalta East Khatla South leh Mission Vengthlang
5. Ward XVI – Bethlehem, Bethlehem Vengthlang leh College Veng
6. Ward XIX – Kulikawn, Tlangnuam, Tlangnuam Vengthar, Saikhamakawn, Melthum leh Hlimen

Ward V – Chanmari, Zarkawt leh Electric Veng chu pawhfuh a ni ve lova, he Ward hi AMC inthlan leha (kumin nilo) Hmeichhia te tan automatic in reserved a ni ang.

2010 AMC Inthlanna ah khan Ward II, Ward IV, Ward VI, Ward XI, Ward XII leh Ward XVII te hmeichhia te tana reserved a lo ni tawh a. Chutiang bawkin 2015 a AMC Inthlanna ah khan Ward I, Ward VII, Ward IX, Ward XIII, Ward XV leh Ward XVIII te chu hmeichhia te chauhin an chuh thei tura reserved a lo ni tawh a ni. AMC a Ward 19 zinga Ward 6 te hi Ram Danpui hnuaia Article 243(T) leh Mizoram Municipalities Act 2007 Section 13 sub section 9 in a phut angin seat zawng zawng atanga hmun thuma thena hmun khat hmeichhia te tana zuahsak thin a ni.

AMC term kallai mek hi kuminah a tawp dawn avangin kumin kum tawp lamah AMC Inthlanna hi neih beisei a ni.

Vawiina AMC a hmeichhia te tana seat(Ward) zuahsak tur thlanaah hian Aizawl DC Pu Vanlalngaihsaka, AMC Municipal Commissioner Pu K. Laldingliana, UD&PA leh GAD Department aiawh te; MNF, MPCC, BJP, MPC, ZPM leh PRISM te aiawh pakhat theuh bakah MHIP, MUP, MPF hruaitu pakhat theuh an tel a ni.

SEC hian Autonomous District Council 3 Inthlan te, AMC Inthlan te, Village Council leh Local Council Inthlan te an buaipui thin a ni.

India rama Municipal Council hmasa ber chu kum 1687 a British hoin an din Madras Municipal Council niin hemi hnu 1726 khan Bombay leh Calcutta Municipal Council te an din leh a. Kum 1882 a Kumpinu aiawha India ramah rolreltu Lord Ripon khan tualchhung inrelbawlna dan a siam leh a. Chuta tang chuan 1919 leh 1935 ah te khan hemi chungchang dan hi siam leh a ni a. India ramin zalenna a neih hnuin kum 1993 khan Ram Danpui siam that niin 73rd Amendment ah thingtlang inrelbawlna Panchayati Raj leh 74th Amendment ah khawpui inrelbawlna Municipalities leh Urban Local Bodies te Ram Danpuia ziahluh a ni ta a. India Ram Danpui a 11th Schedule ah Panchayati Raj chungchang leh 12th Schedule ah Municipalities chungchang hi heng Amendment pahnih te hian an belh a ni.