January 14-a Kut hnathawktute Ni hman dan tur chungchang sawi hovin vawiin khan Chief Secretary conference hall-ah Chief Secretary mawhphurhna la mektu Pu K.Lalnghinglova hovin meeting neih a ni a. NLUP Implementing Board (NIB)Vice Chairman Pu P.L.Thanga leh NIB official te bakah NLUP line department hrang hrang te an tel a ni.

Kut hnathawktute Ni hi district hrang hrang ah January 14 hian a ruala hman a ni dawn a. Aizawl-ah chuan Vanapa Hall-ah function lian tham tak nei turin ruahmanna siam a ni a. Hetah hian Chief Minister chu Khuallian a ni ang a. District hrang hrang ah pawh Minister ten Kut Hnathawktute Ni hi an hmanpui dawn a ni. He programme hmang tur hian University of Minnesota, U.S atangin Professor rualte leh Food and Agriculture Organisation (FAO) atangin mi eng emaw zat bakah phai lam chanchinbumite pawh an lo kal dawn a ni.

Kut Hnathawktute Ni ah hian district hrang hrang ah NLUP hnuaia mimal leh khua ti tha thlan chhuahte hnenah chawimawina pek a ni dawn a. State Level Selection Committee hnuaia mithiam rual ten chawimawina dawng tura District selection committee ten mimal leh khaw hming an rawn chhawp chhuahte chu a hmunah tlawhin an hmalakna te an endik mek a ni.