Vawiin hian Chief Minister Pu Lal Thanhawla chu Lawngtlai CYLA Hall ah All Mizoram Farmer’s Union (AMFU) General Assmbly vawi 16 naah khuallian niin a hman pui a. AMFU te thlakip chanchinbu thar “Thlawhhma” tih chu a tlangzarh nghal bawk.

Thusawiin Chief Minister chuan ramin hma a sawn a, intodelh tura kal a siam mek naah a fawng chelhtu pawimawh kuthnathawktu mi thahnem ngai tam tak kan la nei chu lawmawm hle a a hriat thu a sawia, rim taka hnathawktuten an thar chhuah ang ang te hlawk taka an hralh theih nan sawrkar chuan tih tur awm a pianga a tih zel tur thu sawiin kuthnathawktute phena hlawk lo tum ru an awm a nih chuan eng mi pawh nise sawrkarin a ngaithei dawn lo a ni a ti.

Khuallian chuan kuthnathawktu pungkhawmte chu ram min petu Lalpa duh dan ang zela ram enkawl tura fuihin tun hnaia ram kang tam ta lutuk chu pawi a tih thu a sawia, chutih rualin ram kang thelh tura theihtawp chhuahtute zawng zawng chungah lawmthu a sawi bawk. Kan ram hi Lalpa min pek a ni a, tha tak leh dik taka lo enkawl hi kan bat a ni tih hria a tih tak takna thinlung pua kan enkawl loh chuan min petu Pathian lung a awi zo lovang tih a hlauhawm a ni. Tun hnaia Assam ram nena kan ramri thuah pawh hian ram leilungfate thu khat vua a kal a tul hle a, tuten emaw an mahni hmakhaw sial nana lo hman an tum hian harsatna nasa zawk a thleng thei a ni a ti.

Kan ram neih ang angte thutchilha keimahni ngeiin enkawl lova hnam dang kan enkawl tir thin hi a pawi hle a a hriat thu sawiin Chief Minister chuan Naga leh Khasi te angin a lum emaw a hla emaw tui takin kan ram neihte hi thutchilh thei ila chuan hetiang harsatna lo thleng thin tam tak hi chu kan pumpelh thei in a rinawm a ti bawk.

Ram intodelh kan nih theih nana sawrkar hmalakna lian ber NLUP chu a that em avangin UNO meuh pawhin rawn tel ve an chaka, tunah hian UNO hnuaia Agency hrang hrang panga laite chu lokalin chak zawka NLUP kalpui dan tur zirin hmun hrang hrangah an zinkual mek a ni a ti a. Chutihlaiin dik taka kalpui hleithei lo mi tam tak an lo lang chhuak ta chu pawi a tih thu sawiin kuthnathawktu kalkhawmte chu dik tak a NLUP kalpui theuh turin a ngen a ni.

He huna Khual zahawm Pu H. Zothangliana Parliamentary Secretary pawhin thu sawiin sawrkar chuan a lo tiam tawh ang ngeiin kuthnathawktute leh mi harsa zawkte chu ngaihpawimawh berah a nei zel a, a la thawk zel bawk dawn a ni a ti a, hmasawnna hna thawh kawngah zangnadawmna hleihluak deuhva dawn tum an tam lutuk chu pawi a tih thu sawiin kuthnathawktu kalkhawmte chu ram neitu an nih anga chutiang thil thalote chu ching ve lo turin a chah bawk.

Kumin 17.4.2014 a ram kang thelh vanga nunna chan Tv. Lalsiamkima Ralte, Buarpui khua hnena chawimawina thuziak leh pawisa fai AMFU in a pek chu khualzahawm hian Lalsiamkima Ralte pa Pu Laldawngliana hnenah a hlan nghal bawk.

Vawiina AMFU General Assembly hi AMFU Vice-President Pu C. Lalsawmliana’n a kaihruai a, President Pu Joseph H. Thanzuala’n thusawina neiin Report Pu Zion Lalremruata, General Secretary in a pe thung. Report-a a lan danin AMFU hian member nuaihkhat leh sangriat neiin Branch 26 leh Sub-Headquarters 16 an nei. Vawiin General Assembly ah hian Chief Minister Pu Lalthanhawla, CM nupui Pi Riliani leh Parliamentary Secretary Pu H. Zothangliana te hnenah AMFU Lifetime membership nihna an hlan a ni.