Chief Secretary Pi L. Tochhawng, IAS chuan vawiin khan Kolasib PWD Staff Lodge-ah Kolasib DC Pu Jitender Yadav, IAS leh Official dangte kawmin tun hnaia Buhchangphai Ramthar zau hmuna ramri buai chungchang a sawipui.

Pu Jitender Yadav chuan helai ramri buai chungchanga hma an lak dan hrilhin Ramthar Zau hmuna chengte leh Hailakandi lama chengte inkarah buaina engmah a awmloh thu leh tute emaw misual tlemte chet thawhna avanga ramri hrula inhmuhmawhna hi lo awm chho a ni, a ti a. Hailakandi DC nen an inbiak tuma thutlukna fel tak ( Minute) an siamte chu zawm chhoh zel tur a nih thu a hrilh a ni.

Pi L. Tochhong chuan Pu Yadav-a hi ramri buaina chungchang uluk taka thlithlai reng tur leh boruak tha a awm theih nana vil uluk turin a chah a. Chief Secretary ngenna bawhzui hian reiloteah Ramtharzau hi Pu Yadav chuan tlawh leh a tum a ni. Tun dinhmunah IR battalion company 1 in helai hmun hi an la awmchilh reng a, boruak a thain thil thleng duhawmlo a awm lo a ni. Ramtharzau buaina hi thla kalta April 23 a intan kha a ni a. Thlam pali leh thlai thahnem tak Assam lam mite hian an suasam a ni.

Vawiin vek chawhma lam khan Chief Secretary hian NH 54, Aizawl atanga Khamrang –Kawnpui a tlawh nghal a. Kawng siam hna thawktu ABCI Contractor te chu an hnate uluk taka kalpui tur leh kawngsir tui luankawr (nullah) te uluk tura hrilhin fur chhiat lai pawha kal theih tur khawpa hna thawk tha turin a chah a ni.

Chief Secretary hi Pu Vanlaltluanga, E-in-C, PWD in a tawiawm a , Kolasib-ah hian DC leh SP bakah Official engemawzat an tel a ni.