Vawiin khan Pu P.L.Thanga, Member & Secretary, State Planning Board leh NLUP Implementing Board-a Vice Chairman hovin AH & Vety Dept. hotute leh College of Veterinary Sciences & Animal Husbandry mithiamte’n Mizoram vawk natna PRRS (Porcine Reproductive and Respiratory Syndrome) control dan tur leh chak zawka vawk tih pun leh dan tur relin, NLUP Conference Room-ah Technology Intervention Committee chuan thutkhawmna hmasa ber an nei.
Mizoramah PRRS natna report hmasa ber chu March 2013 khan dawn a ni a, June 2013 khan PRRS ani ngei tih finfiah a ni. AH & Vety Dept. survey report-a a lan danin, Saiha leh Serchhip District-ah a hluar ber a. Aizawl leh a chhehvela NLUP hnuaia vawkte tih punna (Piglet Multiplication Centre) 16-a vawkpui leh vawkpa chu he natna avang hian tam tak thiin, a bang te pawh natna an kai avanga tihhlum (cull) an ni a. Heng harsatna avang hian Mizorama vawk awm zat pawh a tlak hniam phah niin a lang. Technology Intervention Committee chuan PRRS control leh dan dan tur te leh vawk tih punna tur kawngte ngun taka a ngaihtuah hnuin hma thar lak dan tur hetiang hian an buatsaih :-
1. PRRS natna in a tih buai loh Kolasib District leh district danga hmun him bial a ngaih zawng zawngah vawkte tih punna leh he vawk natna laka invenna ‘bio-security measure’ hi tan nghal a ni ang.
2. Ram chhunga vawkte tih punna turin Vety Dept. in vawk him, vawkpui atana hman tlaka an ngaih vulh tute hnenah vawk chaw 50% subsidy in pek a ni ang a. Hetianga subsidy dawngte vawk nu reng reng chu vawkpui atana buatsaih nghal tur a ni thung ang.
3. Hmathar lakna tur hmun hima ngaih bial zawng zawngah natna zirchianna atana suver chikhat, ‘sero surveillance’ kalpui nghal a ni ang a. Vawk natna enna ‘Elisa Test Kit’ a rang thei ang bera lei nghal turin AH & Vety Dept. in hma a la ang.
4. PRRS vawk natna avanga Mizoram-a vawksa indaih lohna nasa tak tikiang turin a tul dan angin kawng tinrengin AH & Vety Dept. in hma a la ang.
Mizorama PRRS natna hmuchhuaktute zing ami, Dr. T.K. Rajkhowa, Vety College, Selesiha Pathology Department-a Head of Department leh a thawhpuite a tul dan ang anga Mizoram tanpui turin Central Agriculture University Vice Chancellor Prof. B.N.Puri leh College mithiamte hian Mizoram tanpui an in huam thu an sawi tawh a. AH&Vety Dept. pawhin sa sattute zingah PRRS natna chungchang leh he natna vei vawk hriat hran dante zirtirna an kalpui mek bawk a ni.
