4026/2023-2024

2024 Vau Thla ni 1:  Chapchar Kut 2024 chu vawiin chawhma dar 10:30 khan Kolasib Tumpui Khelmual ah ropui taka lawm a ni a. Pu Lalfamkima, Mizoram Legislative Assembly Deputy Speaker leh bialtu MLA nibawk chu Kut pa a ni a. Kolasib District Bawrhsap, Pu John LT Sanga chu Kut Thlengtu a ni.

Kut Pa Pu Lalfamkima chuan, Chapchar Kut chu kuthnathawktute chawimawina Kut a nih thu a sawi a. Kan hnam zia leh kalphungte chawikanna a nih thu a sawi a. Chapchar Kut chu kuthnathawktute chawikanna nise a duh thu a sawi a. Mizoram Sorkar pawhin Kuthnathawktute chawikan tumin budget ah pawh Agriculture & Allied ah cheng nuai 77625 a dah thu a sawi a. Hei bakah hian Bana Kaih Policy ah cheng Vaibelchhe 2 bakah SEDP atangin cheng vaibelchhe 1.1 a dah thu a sawi.

Kut Pa chuan, tunlai a Chapchar Kut kan hman dan chu changkanna kal zelah hmanlai nen a in an tawh loh thu sawiin, 'Hmanlai chuan Chapchar Kut hi ni 7 te hmangin nasa takin an lo ur lawk thin a. Kut dawnah hian Lo vat zo lo an awm pawhin an in vahzawh pui tel tel thin a ti a. Mizo ten Kut kan neih hrang hrang zingah Chapchar Kut kan la hmang chhunzawm zel hi a lawmawm a, kan hlut zel a pawimawh' a ti a. Chapchar Kut kan hman chu Mizo nunmawi, Aia Upa zahna leh Tlawmngaihna vawngnuntu ni zel se a duh thu a sawi bawk.

Chapchar Kut ropuina bik chu remna leh induhsakna lan tirna a nih thu sawiin, Mizo Culture vawnhim nan te, Thangthar ten Mizo Culture an vawn nun zel theih nan te, kan hna rohlu chawisan a, chhawmnun zel a nih theih nan a pawimawh tak zet a. Tunlaiah chuan Chapchar Kut bak hi kan hnam nunphung tih lanna a awm meuh tawh lo a. Kut kan hmanna ah hian Kut in a kentel thin Tlawmngaihna, Inremna, In Unauna leh inpumkhatna nei turin Kut hmangtu mipuite ka sawm a ni' a ti.

Chapchar Kut thupui, ‘Zonun Ze mawi, Tlawmngaihna’ chungchang sawiin, Tlawmngaihna chu hnam ti ropui thei, ti zahawm thei a nih thu a sawi a, 'Tlawmngaihna kan neih hi Hnam dang ten Mizo min hriatna, min chawimawina a Ni a ni a, kan chhawm nun zel a pawimawh a ni' a ti. Tlawmngaihna hi Hnam anga Zofate min phuar khawmtu, Hnam anga min dinchhuaktu a ni a. Mahse he tlawmngaihna hi a dal telh telh niin a lang a, kan hlut thar leh a tul a. Zonun Zemawi Tlawmngaihna rilru pu in Kut ila, Mizo dik tak kan nih leh theih nana min hruaitu nise, Rinawmna, Dikna Taihmakna leh tlawmngaihna min neih tirtu ni leh rawh se' a ti bawk.

Pu John LT Sanga Kut thlengtu pawhin thu a sawi a, Chapchar kut kan hman dan chu hmanlai kan pi leh Pute hun lai nen a in ang diak diak thei tawh lo tih sawiin, 'Kan hnam ziarang nen a inzawmna erawh kan vawn nun reng a ngai' a ti a. Kan hman nundan mawi te hi phochhuak zel ila, Pi Pu ten Kut laia Kut hmang nuam ve thei lo an awm hlau a an intanpui thin ang rilru kha pu zel ila. He kut hi kan chawrchhuahna min hriattir tu, Ram leh Hnam hmangaihna rilru min put tirtu ni theuh rawh se' a ti.

Pu Thomas D Lalengliana, President Sub Hqrs. YMA pawhin thu a sawi a, kan hnam rohluber Tlâwmngaihna chuan fak leh châwimâwi aphût ngailova, zânthim ah êng amamawh lova, kawngnâl ah atawlhthlu ngailova, ruahsûr hnuai ah ahuh ngailova, hmeithai pachhia, riangvâi te leh ṭanpui ngaite ban phâk ah a awm reng ṭhin a ni. Hei hi tlâwmngaihna diktak kan hnam rohlû chu a ni  a ti.

Kut hmanna ah hian MZI Hqrs Kolasib ten a hawnna hla an sa a, mimal zai an awm bakah MUP ten Chapchar Kut Titi leh hla do an chham a, MCO leh MHIP ten lam an en tir a. MHIP ten Costume Parade an entir a, Tug of War Kolasib District buatsaihin inhruipawh entir in, MZI Hqrs Kolasib kaihhruaina in Chapchar Kut Lunglen hun hman a ni bawk. He hunah hian Sawrkar Official te leh mipui thahnemtak an kalkhawm a ni.