4025/2023-2024

Khawzawl, 1st March 2024: Zofate kut ngaihhlut hlawh leh ropui ber te zinga mi Chapchar Kut 2024 chu Mizoram hmun hrang hrang te rualin Khawzawlah pawh ropui taka lawm a ni a. 22-Tuichang Bialtu, Govt Deputy Chief Whip ni bawk Pu W. Chhuanawma chu Kut Pa a ni a, Khawzawl Bawrhsap Pu K. Lalrohlua chu Kut Thlengtu a ni.

Sub Headquarters YMA Field, Khawzawl Zuchhip Venga Chapchar Kut lawmnaah hian Kut Pa Pu W. Chhuanawma chuan Khawzawl District Hospital-ah Specialist Doctor dah tura hmalak mek a nih thu leh District Transport Office hawng tura hmalak mek a nih thu a sawi a. Chapchar Kut hmang tura lo kal te chu khawvel ram zau zawk an fan hunah miten an nihna an la zawh tur thu hrilhin, chu hunah chuan an chenna Mizoram ropui leh ropui lohin an nihna a hril dawn tih hre reng turin a chah. Khuallian hian Zoram ropuina turin mitin ten mawhphurhna an nei a ni, a ti bawk.

Pu W. Chhuanawma hian he hunah hian Mizo Essay hmasa ber Kaphleia ziah ‘Thlirtu’ a tlar thenkhat a sawi chhuak a -  “Keimah leh keimah ka rilru a, ‘khawvel hi eng nge ka hnutchhiah ang? Ka ram hi eng nge ka hnutchhiah ang? Hnahthel ro ang in ka tla bo mai dawn em ni?” tia ka inzawh hian chhan har ka ti a, ka lungngai thin a ni. Mi tin pumpelh theih loh thihna chu ka hlau lo va; thlan thim pawh ka hlau hek lo. Mahse, khawvelah thiltih tur pawimawh tak tak a tam tehlul nen, pakhat mah ti lova ka liam tur hian min tilungngai ber a ni, a ti a. Kalkhawmte chu Kaphleia anga ram tana an tih theih inzawt nawn a, fa hrin manhla nih tum theuh turin khuallian hian a chah a. A hnuaia mi ang hian thu a sawi chhunzawm a ni.

dipr.mizoram.gov.in/post/chapchar-kut-2024-khawzawla-pu-w-chhuanawma-thusawi

Kut Thlengtu Khawzawl Bawrhsap Pu K. Lalrohlua pawhin thu sawiin Mizoram min run mektu ruihhlo lakah mitinte kan fihlim a ngai a ni, a ti a. Ruihhlo chu thisen zunzama a luh tawh chuan tal chhuah a harsa a, chuvangin tih chhin ve loh a pawimawh ber a ti bawk. Kut Thlengtu hian Khawzawl District  chu faina lamah te, intodelhna leh taimakna kawngah District dangte entawntlak a nih thu a sawi a. He tih rual hian ramngaw leh nungcha humhalh kawngah nasa leh zuala tan lak tul a ni tiin Bawrhsap chuan ram tikang leh ramsa kaptute chu thuneitute hnenah report hreh lo turin Khawzawl mipuite a ngen a ni.

Chapchar Kut lawmnaah hian Mizo hnam lam, zai leh rimawi tum ngaihnawm leh hmuhnawm tak tak te en ho a ni a, hei bakah hian Hlado Chham leh mipui chai te a hun hman ho a ni. Chapchar Kut chhimtu atangin Chapchar Kut Miss thlan chhuah a ni bawk.

Vawiin Chapchar Kut lawmnaah hian Pu K. Lalzika, President, Khawzawl District Mizoram Upa Pawl chuan hunserh a hmang a. Pu PC Rosiama, President, Sub Hqrs YMA, Khawzawl, chuan lawmthu sawiin inkhawm hi tih tawp a ni.