Chief Minister chuan kuthnathawh hi khawvela hna zahawm ber leh ropui ber a ni a ti. He thu hi nimin Thenzawla  AMFU in, National Bank for Agriculture and Rural Development (NABARD) Regional Office, Aizawl in sum Rs.5 lakhs a peka thlai bazar, ‘Rural Haat’ an sak a hawnna a a sawi a ni.

Chief Minister chuan Mizoram tan NABARD hi kawng tam takah an tangkai hle a ni tiin, lawmthu a sawi a. An mi puihnate hi tangkai takakanhman zel a tul a ni a ti a. He bazar tha tak pawh hi a hman tangkaiah mawhkanphur a ni tiin, a ruak reng anih chuan Thenzawl mipuite mualphona a ni thei a ni a ti.

Chief Minister chuan kan beka thlantui luang zawih zawih khawp a hnathawk tur kan ni tih kan Bible pawhin mi hrilh a ni tiin, khaw khata mi khawsa thei chhungkuate hi mi taima leh tumruhte an ni deuh zel a ni a ti a. Loneimi, kuthnathawktute hi sorkar pawhin a ngaihtuah a. Hlawk zawk leh tunlai thiamna hmanga hna nghet, eizawnna tling an neih theih nan leh tlangram loneih an bansan theih nan NLUP hi kalpui a ni a ti a.Mizorama chengte 60% hi kuthnathawka eizawng kan nih avangin, mahni kawtzawl atang theuh a eizawnna nghet an neihna turin an phak tawk leh an tuina theuh thlan tirin, tanpuina pek an ni a ti a. Taimakna, tumruhna, rinawmna leh Pathian tihna nena an thawh chuan hlawhchhamna tur a awm lo a ni a ti. Kum 5 chhung hian chhungkua 1,20,000 tuamturinsum pawh a awm vek a ni a ti. NLUP tanpuina sum kawng bo a awmkanphal ngai dawn lova, tun thleng hian chutiang chu ala thleng lo a ni a ti. A dawngtu rinawmlo tlemte chauh an awm thu sawilangin, chung mite chu chhinchhiah vek an ni a ti.

AMFU hruaitu, Headquarters, district leh Sub-Division ami zawng zawngte hi kan flagship programme ah keini ai hian an tui zawk emaw tih tur khawpin min tuipui a, kuthnathawktute hnimhnai zawktu an nihnaah hma an la chakin, tunah hian kan infinchhuah reng a ni, Pu Hawla chuan a ti a, an fakawm hle a ni a ti.

NABARD, Aizawl Regional Office a DGM, Pu FR Marak chuan Thenzawla puantahtute pawh tanpuina pek an nih thu leh thlai leh rubber chingtute hnenah pawh AMFU kaltlanga tanpuina an pek thin thu a sawi a ni. Tuna thlai thar zawrhna bazar, Rural Haat hawn tak hi Mizoramah a 6-na anih thu a sawi bawk.

Hawnna inkhawm hi AMFU Gen Hqrs President Pu R.Lalduhawma’n a kaihruai a ni.