Urban Development & Poverty Alleviation Department chuan vawiin nileng khan an din champhaphak vawi 6-na Central YMA Hall, Tuikhuahtlang-ah an lawm a. UD&PA Minister Pu Zodintluanga chu khuallian a ni.
He inkhawm, UD&PA Director Pu K.Lalthawmmawia kaihhruaiah hian Minister Pu Zodintluanga chuan he Department a thawktute zawng zawng thawhrimna a fak a. Department lian leh ropui anga sawi nilo mahse kum 6 chhung leka an hnawthawh thlirin Zoram mipui, a hausa ber atanga rethei ber te nun an khawih danglam mek a ni, a ti. He Department hnuaia hmalakna thenkhatte tarlangin Mizoram University panna kawng siamthatna tur tender chhuah a ni ta te chu lawmawm a tih thu te; Rangvamual, Durtlang leh Phunchawngah chenna neilote tan in tha tak sak mek a nih thu te; Mizoram khawpui ten hma an sawnna tur project chi hrang hrang thawh mek a nih thu te leh DPR siamsa Central Sawrkar atanga sanction nghah mek engemawzat a awm thu te a tarlang. Pu Zodintluanga chuan UD &PA Department chu khawpui hmel cheimawi, tihthianghlim leh hmasawnna kawnga hnarkaitu an nih avangin a thawktute inthlahdah a thiang lova, taima taka thawka ngaihtuahna pawh sen nasat a ngai bik a ni, a ti bawk.
UD &PA hi August 24, 2006 khan din niin an Director hmasa ber chu Pu B.Darkhuma a ni a. He Departmenthian Census of India Notified Towns 22 ah te hma la in an Department hnuaiah hian Town and Country Planning Wing leh Sanitation Wing te a awm a, Aizawl khawpuiah chuan Sanitation Wing hi Aizawl Municipal Council kutah a awm thung. Lunglei, Champhai leh Kolasib District ah District Urban Development Office an nei a. He Department hian Jawaharlal Nehru National Urban Renewal Mission (JNNURM), Urban Infrastructure Development Schemes (UIDS) (10% Lump Sum Grants for North Eastern Region States) leh Urban Development Schemes (UDS) hmang te in khawpui chhung hmasawnna hna nasa tak a thawk mek a ni. Aizawl Municipal Council, Aizawl Development Authority, State Election Commission leh State Investment Project Management and Implementation Unit (SIPMIU) te Nodal Department an ni bawk.
Vawiin inkhawmah hian UD&PA Minister Pu Zodintluanga hian an Deparment website www.udpamizoram.nic.in leh an Logo thar a tlangzarh nghal a. Department Logo design hi inelna buatsaih niin Thangchhuana, Ramthar North veng design chu thlan a ni.
