Vawiin khan Kolasib district a hmun hrang hrang paruk: Kolasib, Bilkhawthlir, Vairengte, Kawnpui, Bairabi leh Bukpui; ah Kuthnathawktute Ni pualin hun hman a ni.

Kawnpui-ah chuan Kuthnathawktute Ni hi Awithangpa Hall-ah hman niin, Tuirial bialtu MLA Pu Hmingdailova Khiangte, Parliamentary Secretary in a hmanpui a. He ni puala inkhawm Pi Melody Ngurthantluangi, BDO Thingdawl kaihruaiah hian Pu Hmingdailova Khiangte chuan Kuthnathawktute puala ni hman a ni chu ropui a tih thu sawiin, kuthnathawktute sorkarin a ngaihven a an dinhmun sawhngheh nan hma ala zel dawn a ni a ti a. Mizoramin tharchhuah kan la nei tlem a, tharchhuah lama kan tan a, kan intodelh theih nan kuthnathawktute tang sauh sauh turin a fuih a ni.

Bilkhawthlir-ah Kuthnathawktute Ni pual hian Bilkhawthlir Community Hall-ah hun hman niin, Pi C.Lalduhzuali, BDO Bilkhawthlir-in hun hi a kaihruai a, Serlui bialtu MLA Pu K.Lalrinthanga, Parliamentary Secretary chuan khuallian niin he hun hi a hmanpui. Thusawiin Pu K.Lalrinthanga chuan sorkarin kuthnathawktute chawikan nan leh kuthnathawh hi eizawnna tlak a nih theih nan NLUP a duang a, kuthnathawktu tam takin an dinchhuah phah chu lawmawm a tih thu a sawi a. Sorkarin NEDP hmangin kuthnathawktute dinhmun a sawh ngheh sak zel dawn a ni a ti a, chutihrualin kuthnathawktute duhsak tlak leh malsawm tlaka taima taka thawk sauh sauh turin a fuih a. Chemphai-ah Kuhva Scope siamna tur buaipui mek anih thu a sawilang tel bawk.

Kolasib-ah chuan District Bawrhsap Pu H.Lalengmawia kaihhruaiin Parish Hall-ah hman a ni a, bialtu MLA Pu PC Zoram Sangliana, Chairman MIFCO in hmanpui a. He ni pual hmanna inkhawmah hian Pu PC Zoram Sangliana chuan sorkarin kuthnathawktute a ngaipawimawh a, taima taka thawkte a ensan dawn lova a tiphuisui zel dawn a ni a ti a.mSorkar in kuthnathawktute tharchhuah dahthat leh a hralhna tur a ngaihtuah zel dawn a ni a ti bawk. He hunah hian Pu Lalkiamlova, Commissioner, Planning Board chuan thusawina hun a nei bawk a ni.

Vairengte-ah Dr.Arun T, IAS SDO(C), Vairengte hovin Vairengte Community Hall-ah hman a ni a. Bairabi-ah chuan Zampuimanga Hall-ah Dr.C.Lalzarliana, Director Agriculture Department hova hman a ni a. Pu R.Lalremsanga, Addl.DC hovin Bukpui-ah hman a ni thung. Kuthnathawktute Ni puala hun hmanah hian "Hah tak leh rim taka thawk chungin kan ei zawk a ni"(II Thessalonika 3:8) tih thupui hmangin kuthnathawktute fuih tharna hun hman a ni a.

Kuthnathawktu hlawhtling te hnen atang an hlawhtlin chhoh dan leh an hmalak dan te ngaihthlak a ni bawk.

Vawiin kuthnathawktute Ni puala hun hmanah hian NLUP tanpuina sem a ni a. Kolasib District chhunga NLUP 3rd & 4th Phase a Agriculture leh Horticulture Department hnuaia tanpuina dawngtute hnenah sem a ni.

Agriculture Department hian WRC-I thlangtu mi 88 hnenah Rs.25,000/- theuh, WRC-II thlangtu mi 112 hnenah Rs.24,000/- theuh, Oil Palm thlangtu mi 544 hnenah Rs.20,000/- theuh leh Sugarcane thlangtu mi 6 hnenah Rs.16,000/- theuh an sem a. Tanpuina dawngtute hi an vaiin mi 750 niin, tanpuina sum semchhuah zawng zawng hi Rs.1,58,64,000/- a ni. Horticulture Department hian Kuhva thlangtu mi 287 hnenah Rs.2,000/- theuh, Serthlum thlangtu mi 31 hnenah Rs.500/- theuh leh Iskut thlangtu mi 9 hnenah Rs.1,000/- theuh semin, tanpuina semchhuah zawng zawng hi Rs.5,98,500 a ni a, tanpuina dawngtu zawng zawng hi mi 327 an ni.