Vawiin chawhma dar 11:00Am khan MYA (Model Youth Association) Hall, New Siaha-ah Pu Hiphei, Speaker, Mizoram Legislative Assembly hova Farmers’ Day hman a ni. Vawiin Farmers’ Day thupui atan “ Hah tak leh rim taka thawk chungin kan ei zawk a ni” (II Thess 3:8) hman a ni a. He Farmers’ Day function hi Pi Harleen Kaur IAS, Bawrhsap, Siaha District in a kaihruaia, Rev.Beima, ECM Pastor in hunserh a hmang.

Vawiin kut hnathawktute Ni hmanna-ah khuallian Pu Hiphei chuan thu sawiin, Mizoram Buai kum 1966 hmalam kha chuan Mizo te hi Mautam leh Thingtam lai te tih lohah chuan thawhrimna hmanga intodelh tak hnam kan ni thin a. Kum 20 chhung Dolung leh Tuboh inkara kan lo awm khan min ti thachhe zo va, thawhrimna atanga ei hmu te aiin kut tling lova sum hailuttute kan ngaisang ta zawk a. Kut hnathawh te pawh kan zahpui ta emaw ti mai turin, thawk-hah lem lo va eihmu kan lo tum ta vek zawk a. Sawrkarin ram hmasawnna tur Scheme leh Project hrang hrang tha tak tak te duang thin mahse, thawhrimna leh rinawmna kan tlakchham tak avangin kan nih tur kan ni pha ta lo a ni. Heng te avang hian tunah sawrkar hian mi thawkrim tak tak, kut hnathawha eizawng te hi a ngai pawimawh em em a, an pualin Kut hnathawktute Ni hial a lo siam ta a. Kut hnatawktute chawikan nan leh leirem an rah ve nan NLUP te duangin, tunah hian a thlaktu tur NEDP an duang leh mup mup tawh a ni, a ti a.Kut hnatawhtute leh sawrkar hi kan tanrual tlat chuan Mizoram hi ram nuam, ram intodelh leh Kristian State tihawm renga mawiah kan chhuah leh thei a ni, a ti bawk.

Vawiin programme hmanna-ah hian NLUP tanpuina hmang tha a hlawhtlinpuitu titha zual 3 thlan chhuahte hnenah lawmpuina tangkafai Rs.5000/- theuh Khuallian Pu Hipheia’n a hlan hlawm a. Heng mi 3 Pu te:1) C.Sadô, Kiasie khua ( Aquaculture- Fisheries Dept hnuai a mi.), 2) Beima, Zyhno khua ( Hmunphiah chingtu- Soil & Water Conservation Dept. ) leh K. Chhungnawnga( Grape chingtu- Horticulture Dept.) te hian thusawina hun hmangin, an hlawhtlinna kawnga an hmalak dan leh hmachhawpte mipui kalkhawm hma-ah an sawi bawk. Pu N.Chakhai, Addl.DC leh Dr.Chawngkhuma, President, AMFU Siaha District ten thusawina hun an hmang bawk. Farmers’ Day programme hi lawmthu sawinain Pi Marilyn Rualzakhumthangi, NLUP Nodal Officer leh SDO(S) ni bawk chuan a khar ta a ni.