Vawiin khan Kut Hnathawktute Ni lawmna inkhawm chu Lunglei Convention Centre-ah hman a ni a. Horticulture Minister Pu PC Lalthanliana chu Khuallian niin a hmanpui.

Kut Hnathawktute Ni lawmna inkhawm hi Lunglei District NLUP Coordinator Pu Zathangliana’n a kaihruai a. Khuallian Pu PC Lalthanliana chuan kut hnathawktute chu ram ei leh bar inghahna an ni tiin, sawrkar pawhin a ngaihpawimawh a, anmahni puala Kut Hnathawktute Ni buatsaih a nih thu a sawi a ni. Mizoram sawrkar hnathawkte hi kan nu leh pa te a nih loh pawhin kan pi leh pu te kut hnathawh rimna sengtute kan ni, a ti a. Chuvang chuan eng dinhmuna ding pawh ni mah ila kut hnathawh hi a zahawm a, kan hmusit theilo in, kan ngaisang lo theilo a ni, a ti.  Mizoram chu mi taima tana ei hmuhna ram a la ni dawn a ni, a ti bawk. Khuallian chuan hausak hmasak tum lovin hlawhtling tumin hna thawk tura a duh thu a sawi a, hlawhtlin tuma kan beih chuan hausak tum a ngailo a ni, a ti a. Sawrkar chuan a tih tur a ti kim thawkhata a hriat thu sawiin, kut hnathawktute pawhin kan tih tur kan tih a pawimawh takzet a ni, a ti. Tih hram hramna, taimakna leh tuarchhelna tello chuan hlawhtlinna a awmlo a ni, a ti bawk.

Rev. K.V. Thanga, Worship & Music Director, BCM Headquarters, Serkawn chuan kumina kut hnathawktute Ni lawmna thupui – ‘hah tak leh rim taka thawk chungin kan ei zawk a ni’ tih hmangin thu a sawi a. Pu Vanlalmuana, DIPRO Lunglei pawhin Lunglei khawpui chhunga Kut hnathawktu hlawhtling te hmalakna presentation hmangin a tarlang a ni. AMFU President Pu Joseph H. Thanzuala pawhin thusawina hun a hmang bawk.