Kutthemthiam hmanga ei zawngte tana buatsaih ni khat awh State Level Marketing Workshop chu vawiin khan I&PR Auditorium-ah neih a ni a. He hun hi Ministry Of Textiles hnuaia Marketing & Service Extension Centre, Office of the Development Commissioner (Handicrafts) in a buatsaih niin, Dr. Zohmangaiha (IRS Rtd.), Chairman, MAHCO chu Khuallian a ni a, Pu Lalremliana, Deputy Manager, ZOHANDO chu Khualzahawm a ni bawk. Workshop-ah hian Pu T. Rollee Vareishim, Assisstant Director (H), Ministry of Textile chuan kalkhawmte lawmna thu sawiin, mithiam sawm bik ten handicraft lama eizawngte tana hamthatna awm te leh, an thiamna belhchhah zel theihdan tur kawngte inzirtirna hun an hmang a ni.

Dr. Zohmangaiha chuan state pawna trade fair neih naah hnam dangten Mizo kutchhuak thilte hi an lei duhin, tam tham taka supply tur a dilna te an hmuh fo thu sawiin, kan taimak phawt chuan kan kutchhuakte hi hralhna tur a awm reng a ni, a ti a. Nalh leh tlo tha taka kutthemthiam thilte hi kan siam chuan man bituk zat tur lamah chuan harsatna a awm dawnlo a ni, Khuallian chuan a ti bawk.

Vawiin workshop-ah hian sorkar laipuiin LIC nen tangkawpin, kutthemthiam hmanga eizawngte tan hamthatna a siam, Aam Aadmi Bima Yojana chungchang inzirtirna neih a ni a. He scheme hi thingtlang leh khawpuia cheng mirethei BPL member, kum 18 atanga 59 inkarte tan Life Insurance an neih theihna tura duan a ni.