Vawiin chawhma dar 11:00 khan Serchhip DC Office Meeting Room-ah Lok Sabha inthlanpui lo awm tur leh Hrangturzo Assembly bial Bye-Election lo awm tur atana District Level Standing Committee chu an Chairman leh District Bawrhsap ni bawk Pi Juhi Mukherjee IAS hovin an thukhawm a, inthlanpui tana ruahmanna chi hrang hrang te an thlir ho.

He meeting-ah hian inthlan hun tur puan a nih tawh avanga Model Code of Conduct hman tan a nih tawh thu te leh he dan bawhchhia an awm a nih chuan Help-line No. 226099-ah report theih a nih thu sawi a ni a, Mizo tawnga siam; Model Code of Conduct Guide Line chu meeting-a kalte hnenah sem a ni bawk. Tin, Election dan kalha chetna a awm leh awm loh vilzui turin Serchhip District chhunga Assembly Constituency pathumah te MCC Monitoring Team siam a ni a, 26 Serchhip-ah Pu Lawmkima SDO(S) Serchhip, 27 Tuikum-ah K. Lalhmuakliana SDO(C) Thenzawl leh 28 Hrangturzo bialah NgulsangvelaSDO(C) North Vanlaiphai te chu mawhphur tura ruat an ni.

He meeting-ah hian Election Commission duh dan anga candidate-te sum hman dan vil tur leh an sum hman zat chhutna tur atana rate hrang hrang siam tawhte chu pawm a ni a, Public Meeting te, Rally leh Campaign-na atana motor hmang tur reng rengin Form siamsa hmangin District Election Officer hnenah phalna an la hmasa zel tur a nih thu sawi a ni bawk. Tin he inthlanpui lo awm turah hian mipui a tam thei ang berin vote an thlak theih nan theih ang anga tan lak nise tiin an rel bawk a ni.