Vawiin chawhma dar 11:00 khan SSA BRC hall Serchhip-ah Pu K. Lianzuala, Tuikum bialtu MLA leh Mizoram KVI Board Chairman ni bawk chuan Middle School-a hmanturinComputer Laptop a sem. Heng computer set-te hi SSA Mission hnuaia Computer Aided Learning Programme at?anga sem a ni.

He laptop sem inkhawma khuallian Pu Lianzuala chuan thu sawiin Mizote hi hun engemawti lai atang khan a dawn lama thahnem ngai tak, a enkawl zui leh hman tangkai lama hnufum leh si kan ni fo thin tih sawiin heng an thil dawnte pawh hi mahni ta ang taka en a, a nihna tur takah, a tangkai thei ang bera hmang turin a chah a, zirna chu sawrkarin a ngaih pawimawh em avangin Commission pawh a din hial reng a, tunlai thiamna leh hmasawnna mila zirtirtu leh naupang te pawh an inher rem ve zel theih nan, heng programme te pawh hi siam a ni tiin, heng computer semte hi a nihna tur ang taka hman a nih chuan khawpui naupangte leh thingtlang naupangte hriatna leh hmasawnna inkar zau lutuk thin pawh a sawr zim ngei a rin thu a sawi bawk a ni.

Pu Lianzuala chuan zirtirtute chu kan rama dinhmun pawimawh tak chelhtu an ni a, tunhma phei chuan sikula zirtirtu chauh nilovin, khawtlang kaihruaitu tak tak an ni a, Pastor dawttu hiala dinhmun zahawma ngaih thin an ni a, tunah erawh chuan nun qualified lo leh biak in kawng hre lo zirtirtu an tam tawha a hriat thu a sawi a, zirtirtu kalkhawmte chu naupangte tana hriatna chauh pe lova, nun entawntlak phochhuah tum turin a chah bawk a ni.

He hunah hian Pu Lianzuala chuan zirna kawnga sawrkar ding lai hmalakna thenkhatte sawi langin, a bial chhung Chhingchhip-a Sainik School lo ding mek chuan Mizoram tan mi hmantlak, ram kaihruai tura mi fing leh thiam, khawtlang khaiding tura mi rintlak a chherchhuah ngei a beisei thu a sawi a, Electoral Roll ennawn chungchanga Serchhip District chhunga Assembly Costituency pathuma te dinhmun pawh sawi langin Serchhip District chhungah voter punna a tlem viau chu Serchhip District hi India ram pumpuiah ziak leh chhiar thiam tamna ber leh hnamdang te pawlh vak lova Mizo rilru dik tak pute awmna a nih vang a nih a rin thute a sawi bawk a ni.

He computer sem inkhawm hi SSA DPC Serchhip District Pu C. Lalthanzira chuan a kaihruai a, tun dinhmunah Serchhip District-a khaw awm zawng zawngah Primary leh Middle school a awm vek tawh thu leh sawrkarin khua anga a puan ni lo, mihring chen tamna ‘habitat’ ah PTC Thenzawl chu pawm a nih avangin Primary school din tura chak taka hma lak mek a nih thu a tarlang bawk a ni. He inkhawmah hian District Education Comittee Chairman leh District Bawrhsap ni bawk Pi Juhi Mukherjee IAS pawhin thu a sawi bawk a ni.

Vawiin computer semna hunah hian Serchhip District chhunga Middle School thlan bik 32, BRC 2 leh SSA Girls Hostel pakhat hnenah loptop (Toshiba), Monitor (LED 32 inch), leh UPS (1KV) pakhat theuh sem chhuah a ni.