Vawiin khan Trade & Commerce Minister Pu Lalrinliana Sailo chuan Pachhunga University College-ah “Regionalism, Sub-regionalism and Connectivity : India’s Foreign Policy in the 21st Century” tih thupui hmanga Jadavpur Association of International Relations (JAIR) buatsaih international seminar a hmanpui.

Minister chuan kum reilote chhunga Asia chhimchhak ram te than chakzia thlirin India Sorkar pawhin inkungkaihna tha lehzual siam turin kawng a dap a, Look East Policy duang chhuakin he policy hlawhtlin nan hian Myanmar leh Bangladesh karcheha awm Mizoram chuan hmun pawimawh tak a luah a ni, a ti. Look East Policy hlawhtlin theih nana Mizoram Sorkar hmalakna thenkhat sawiin Zokhawthar leh Melbuk-a Land Custom Station leh building pawimawh sak te, Chhimtuipui kaltlanga Myanmar ramri depa Land Custom Station sak tum a nih thu te, kum 2010 a South East Asia ram palai ten Mizoram an tlawh thu leh trade lama inkungkaihna a that lehzual theih nan thil pawimawh hrang hrang an ngaihtuah ho thu te bakah kawngpui tha tellova sumdawnna a hlawhtlin theihloh avangin Rih-Falam leh Rih-Tidim kawngpui sial chungchang te, Tiddim-Falam kaltlanga Rih-Kalemyo kawngpui chei that chungchang ngaihtuah a nih thu leh amah ngeiin Myanmar pawh tum hnih lai a tlawh thu Trade & Commerce Minister Pu Lalrinliana Sailo chuan a tarlang.

Bangladesh nena inkungkaihna lam pawh chak taka hma lak a ni thu sawiin Minister chuan Kawrpuichhuahah Border Trade Facilitation leh Trade Centre sak a nih thu te, Mizoram Chamber of Commerce and Industry leh Federation of Bangladesh Chamber of Industries ten MoU an ziah tawh thu te, Khawthlang Tuipui kaltlanga sumdawnna kalpui dan ngaituah a nih thu te a sawi a. Hmarchhak State te hi Bangladesh, Bhutan, China leh Myanmar te nena inri an nih avangin sorkar laipui tan a pawimawh hle a, a leilung hausakna haichhuah hmabaka awm te leh tuichakna hmanga kawlphetha hnianghnar leh hralh suma chang thei a siam mek avang hian dinhmun pawimawh tak a la luah chho zel dawn tih sawiin India ram sumpai leh ram dangte nena inlaichinna, a bik takin hmarchhak State te kaihhnawih ngaihtuah leh sawiho tura lo kal mithiamte chuan seminar ni hnih an hman chhung hian hmasawnna thil ropui engemaw tal an puak chhuah ngei a beisei thu Trade & Commerce Minister hian a sawi a ni.

Seminar-ah hian Ministry of External Affairs hnuaia Special Secretary (Development Partnership Administration) nihna chelh mek Ambassador PS Raghavan chuan Seminar-a ngaihtuahho tur thil pawimawh chi hrang hrang a tarlang a. MZU Vice Chancellor Prof. R Lalthantluanga bakah Maulana Abul Kalam Azad Institute of Asian Studies (MAKAIAS)-a Director Dr Sreeradha Dutta leh Dr Surojit C. Mukhopadhaya, JAIR ten thu an sawi bawk. Seminar hian naktuk thleng a awh ang.