Lemchan khawvela Mizo thalaiten hma an sawn zel theih nana Information & Public Relations Department leh Mizoram Film Development Society (MFDS) tangdunin ni ruk awh tur “Basic Course on Acting Skills” an buatsaih chu vawiin khan IMFA Training Hall, Art & Culture Directorate Building-ah Parliamentary Secretary Pu Lal Thanzara chuan a hawng.

Khuallian chuan lemchan zirna kawnga hmalak zel a ni chu lawmawm a tiin,Indiaramah ringawt pawh film industry-hi sum tam tak chetvelna industry a ni tih tarlangin, lemchan chu eizawnna tling a nih theih thu a sawi. Eizawnna dang ang bawkin, taimakna leh tumruhna tello chuan hlawhtlin mai theih a ni lo tih hrilhin, Khuallian chuan thalai kalkhawm te chu thahnem ngai taka bei zelturinthalai kalkhawmte chu a fuih bawk.

Mizoram University kawngchhia avanga kawngpui dan tum chungchang Pu Lal Thanzara chuan sawiin, kawngpui tha a awm theih nana Sawrkarin theihtawpa hma a lak mek reng thu a sawifiah a. Sum sanction hmuh tlai a nih avang leh chhan hrang hrang avanga duh anga chak taka hma lak a harsat thu te sawiin, mipui ten sawrkar hmalaknate hriatthiampui turin a ngen a ni.

Lemchan zirna hawnna inkhawm hi I&PR Director Pu Jim K.Chozah’n a kaihruai a. Lemchan zirna hian ni 19^th – 24^th August, 2013 thleng a awh dawn a, heta tel tur hian Mizoram District hrang hrang atangin thalai thahnem tak an kal khawm a, an zinga a naupang ber hi Lalchhuansangi, kum 8 mi niin, a upa ber chu K. Lalengmawia, kum 68 a ni. Training zo te hnenah Certificate pek a ni ang. Training hi Pu F. Hrangmuana, Pu Vanlalhuma leh Pu C. Hmingthangvunga (General Secretary, MFDS) ten an zirtir dawn a ni.