Vawiin khan Agriculture Minister Pu R.Lalzirliana chuan Agriculture Conference Hall-ah Directorate of Agriculture (Research & Education) hnuaia Krishi Vigyan Kendra (KVK) te hmalak dan thlir letna hun a hmanpui. Minister hi Parliamentary Secretary Lt.Col.Z.S Zuala’n a tawiawm a ni.
Pu R.Lalzirliana chuan KVK a Scientist te hi kuthnathawktute tanpui thei turin kawng hrang hranga mithiam bik, rampum huap pawha zahpuiawm loh tak tak an ni tiin thawhhona tha tak an neih avangin buh leh bal thar chhuah kawngah hma kan sawn chho mek a ni, a ti. Khawzawl, Lawngtlai, Saiha, N.Vanlaiphai leh Lengpuiah KVK Centre hawn thar a nih hnuah District tinah loneitute tanpui tur mithiam bik an awm ta a, thlai chi thar, khawl thar leh tih dan thar te zirchian leh enchhin hmasak a nih hnuah loneitute tana tangkai turin Mizoram mila hman tangkai dan an lo thiam deuh deuh ta, a ti a. Buh thar rang, tui leh tha chi kum 2011 atanga an lo enchhin tawh CAUR pawh a thatzia finfiah ni tawhin tlangzarh a ni tawh a ni, a ti. Agriculture Minister chuan Mizorama kuthnathawktuten buh baka an thlai chin tam ber sawhthing ‘tam’ thin chu a enkawl dan zirchian mek a ni tih sawiin heng an zirchianna atanga an thil hmuhchhuahte hi kuthnathawktuten tangkai taka an lo hman ve theih tura chhawp chhuahsak thiam deuh deuh turin a fuih a. Mimal sum hmuh nan nilo, Mizoram mipuite tana thil tha zawk zawnga thawk an nih hre renga lungrual taka thahnemngai lehzuala hnathawk turin Pu R.Lalzirliana chuan kalkhawmte a sawm a ni.
Parliamentary Secretary Lt.Col.Z.S Zuala pawhin thu sawiin Mizoramah thlai leh buh thianghlim leh hrisel, tui leh tha zawk kan neih theihnan loneitute tanpui kawngah KVK mithiamten mawhphurhna sang tak an nei a ni, a ti a. Loneituten thlai tihthat nan hlo (pesticide) an hman nasat luattuk avang hian natna hlauhawm cancer pawh mihringin a vei phah thei nia mithiamten an hriat thu sawiin hemi kawngah hian fimkhur a ngai hle a ni, a ti. Chemical laka fihlim organic thlai leh buhte hi taksa tan a hrisel a, damdawi hmang te aiin a let sawm dawnin a hlawk zawk tih hria a organic uar deuh deuh a that thu Parliamentary Secretary chuan a sawi bawk.
Keynote address sawitu Director, Agriculture (R&E) Pu Lalrinliana sawi danin KVK hnathawh nan kum 2015-2016 Annual Action Plan atan cheng nuai zaruk sawmriat ruahman niin hei hi August 25 khan sawrkar laipui-ah thehluh a ni a. CSS hrang hrang - Post Harvest Technology Management, Seed Village Programme leh NFSM te kalpui mek a ni. Govt. of India atangin National Mission on Oil Seeds and Oil Palm kalpui nan kumin bik atan cheng nuai sawmnga pahnih hmuh a ni tawh bawk a, scheme thar Sub-Mission on Seeds and Planting Materials kalpui tura ruahmanna siam a ni tawh bawk.
Tualto buh leh thlai chi tha humhalh nan KVK hian buh leh thlai chi hrang 69 a register tawh a. July, 2015 khan National Seminar on Protection of Plant Varieties and Farmers Rights Act programme kal zelah Mizoram aiawhin Hnahthial KVK an tel a. Rampum huap exhibition-ah pathumna an ni.
Review meeting hi Agriculture Department Jt.Secretary Pu Lalrammawia’n a kaihruai a. Technical Session-ah KVK Lengpui, N.Vanlaiphai, Hnahthial, Khawzawl, Lawngtlai, Saiha leh Kolasib a Programme Coordinator te’n an hmalakna tlangpui an tarlang a. Chawhnuah sawihona hun neiin meeting hi tihtawp a ni.
