AYUSH Medical Officer te tana buatsaih, ni hnih awh tur Review Meeting on AYUSH Programme & Clinical Orientation for Medical Officer (AYUSH) chu vawiin khan Aizawl Civil Hospital Conference Hall-ah tan a ni.

He AYUSH Review Meeting hi Dr.C.Lallunghnema, Deputy Director (AYUSH) in a kaihruai a. Participant ten inhmelhriattirna hun an hman zawh hnu ah Dr. Lallunghnema chuan kalkhawmte lawmna thu a sawi a. AYUSH chu mipui vantlang hriselna thlentu peng pawimawh tak an nih thu tarlangin Review Meeting chu hlawk taka hmang turin a chah bawk.

He hun hmanpuitu Dr. K.Ropari, Principal Director H&FW chuan sawihawnna hun a hmang a. Pi Ropari Report in a tarlan dan chuan AYUSH hi Indian System of Medicine and Homeopathy (ISM&H) hming puin kum 2001 khan Mizoramah Health Department hnuaiah din a ni a, kum 2003 khan AYUSH hming put tir a ni ta a, tunah hian AYUSH hi Principal Director H&FW kaihhruaina hnuaiah Director neiin a inrelbawl mek a ni. Tun dinhmunah hian Mizoram chhungah AYUSH Doctor nghet mi 11, RCH leh NHM hnuaiah Contractual mi 21, School Health hnuaiah mi 23, an vaiin mi 55 an awm mek a. Mizoram District 8-ah hian AYUSH OPD dah kim a nih tawh bakah CHC 7-ah AYUSH in entirna a awm mek bawk. Tunah hian khum 50 awm theihna tur AYUSH Hospital chu Thenzawl-ah sak mek a ni bawk a. Hna pawh za a sawmriat chu zawh fel a ni tawh a ni. AYUSH Department hian 2014 leh 2015 chhung hian Achievement engemaw zah an nei bawk. Dr. Lalbiakkima, Director, DHME chuan AYUSH awmzia sawi zauhna hun a hmang a.

Dr. Lalbiakkima chuan Allopathic leh Homeopathic Doctor te hi kan System of Medicine in ang lo mahse, tumah sang bik leh hniam bik kan awm lo va, lungrual taka thawkho vek tur kan ni a ti. Dr. Rohmingthanga Ralte pawhin thusawina hun hmangin AYUSH Doctor-te chu hotute thuawih thiam tur te, thawhhona tha nena theihtawp chhuah turin a fuih a.Health Programme hrang hrangte mipui vantlang hnena puangzartu ni turin a chah bawk a ni. Anni bakah hian Dr. Lalbiakzuala, Mission Director, NHM leh Dr. Rosangluaia, Medical Suptd. Civil Hospital Aizawl te pawhin fuihna thu an sawi bawk.

Vawiin Review Meeting ah hian Mithiam thlanchhuah sawm bik ten Office Procedure, Administration & Etiquette, Record Keeping & Reports chungchangah zirtirna an pe a. Naktuk lamah Reduction of Infant Death chungchang zirhona leh Review Meeting kharna hun neih a ni ang.