Mamit a JNV School sak mek chungchangah hmalak zel dan tur sawihona vawiin khan Dr. Ngurdingliana Sailo, MAMCO Chairman hovin Mamit DC Conference Hall-ah neih a ni.

Vawiin meeting-ah hian Pi Lalbiaksangi, Deputy Commissioner Mamit chuan meeting neih chhan sawiin, kum 2008-ah khan Sorkar laipuiin JNV school building sak tur chungchang hi hriattirna a chhuah tih sawiin, dan ang chuan ram ruaka sak tur a tih a ni a. Mahse ram ruak rem tak hmuh mai tur a awm loh avangin Pi Lalrinngheti leh Pu H.Lalbiakmawia ten an ram phal taka pe in, an ram aiah sorkarah hna nghet pek tur inremna siam pui an ni a. Tunah hian JNV hian Mamit Hmar Veng Bazar building an luah mek a, January 2015 thleng luah tura tih a nih lain JNV school building hi sakzawh a la nih loh avangin February 2016 thleng an luah theih hunchhung hi pawh sei sak an ni thu kalkhawm te a hrilh a. Inremna anga ram neitu te hna nghet pek an nih theih nan hmalak mek zel a ni a chak taka bawhzui mek a nih thu a tarlang bawk. Hei hi hmalakna kal mek zel a nih avangin ram neituten stay order an pek pawh hnukkir leh turin DC hian ram neitute a ngen a ni.

Dr. Ngurdingliana Sailo chuan JNV building chu sak zawh thuai a nih theih nan theihtawpa hmalak a tum thu a sawi a, hemi atan hian sorkar laipui pawh a dawr dawn tih a sawi. Central school tha Mamit ah din a ni thei chu thil lawmawm tak a ni thu sawiin Mamit khaw mipui te leh district mipui te’n tangkai taka an hman a beisei tlat thu a sawi.

JNV school hotu te pawh khawchhung leh district mi leh sa tam zawk an luh theih nan an admission kalphung pawh siamtha deuh turin a ngen bawk. Meeting-ah hian ram neituten stay order an pek chhuah chhan te an sawi bawk a. Hei bakah hian NGO hrang hrang ten JNV school in Bazar building an luah avanga harsatna neuh neuh mipuiin an tawh te an sawi lang bawk.

JNV school sak hna hi MAMCO chuan thawkin, Sorkar laipui ministry Human Resource and Development hnuaia Navodaya Vidyalaya Samiti wing hnuaiah sak a ni.

Vawiin meeting-ah hian district a sorkar official te bakah JNV school building sakna ram petu te leh NGO te an tel a ni.