Nimin khan Aizawl Deputy Commissioner Dr. Franklin Laltinkhuma chuan DC Conference Hall-ah chanchinthar lakhawmtute a kawm a, Ramhlun Sports Complex leimin tuartute inhmun chungchang sawifiahin helai rama mirethei In sa sorkar in a thiah sak anga thuthang awm chu thu diklo a ni a ti.

Aizawl DC chuan Ramhlun Sports Complex veng leh Laipuitlang leimin avangin chhungkaw tam takin In leh Lo chana mangang taka an awm lain sorkar chuan heng chhiatna rapthlak tak avanga inhmun chan te an inbenbel nan leh inhmun neih nan Rs. Nuai 100 a in ram a lei thu sawiin chhiat tawk chhungte pawh an lawm hle tih a sawi.

Sorkar ram lei hi kum 2013 khan Ramhlun Sports Complex Local Council te kaihhruaina in Land Revenue Surveyor te kawhhmuh ang zelin an teh/ chhinchhiah fel a, khawl hmangin a ram awmdan leh degree te an chhinchhiah fel thlap a. Ni 9.9.2014 ah Inhmun plot leh actual demarcation chu Ramhlun Sports Complex Local Council enpui na in UD&PA lam atanga surveyors te chuan an va teh fel leh thu DC chuan sawiin hmalak zel anih laiin chu lai ram awl sorkar ram lei chhung ami chu leimin tuar ve lo mithenkhatin ram an in sem thu YMA Ramhlun Sports Branch in an complaint avangin enfiah nawn leh anih thu Aizawl DC Dr. Franklin Laltinkhuma chuan press mite chu hrilhin Magistrates, revenue Officer leh Police ten zahngaihna lantirin tih chhiat vek tura thu an ken chu tlem chauh an thiah sak zawk thu a sawi a ni.

Hetianga mi vanduai leh mangang tana ram pek tura sorkar-in a duan, chhiat tawk awm leh thei te tana ram pek tur mi thenkhatin an lo in pe leh hralh ringawt hi Mizo mipui leh chhiat tawkte zah lohna a nih thu DC chuan a sawi bawk.