Krishi Vigyan Kendra (KVK) Kolasib chuan NABARD, Mizoram hnuaia ‘Lac Project’ an kalpuinaah Thingdawl Farmers’ Club Member thlan bikte hnenah hamthatna chi hrang hrang a sem a.  Khuallian Kolasib Deputy Commissioner Dr.Arun.T. leh Khualzahawm NABARD Regional Office Deputy General Manager Pu J.Suresh ten he hun hi an hmanpui a, Kolasib-a sorkar department hrang hrang hotute pawhin an telpui.

Lac Project hnuaia tanpuina semna inkhawm KVK Senior Scientist & Head Dr. Michelle C.Lallawmkimi kaihhruaiah Khuallian Kolasib DC Dr. Arun T. chuan Lac ching tur loneitute hnenah tanpuina hrang hrang semin fuihna thu a sawi a, KVK-in project a kalpui dan leh hnathawh dan tha a tih thu a sawi bawk. Khualzahawm NABARD DGM Pu J.Suresh chuan loneitute hnenah NABARD kalphung leh nihna te hrilhfiahin hlawhtling tur chuan taimakna leh thawhrimna a pawimawh a ni a ti. 

He hunah hian Project i/c Scientist (Agro-forestry) Dr. Rebecca Lalmuanpuii chuan project kalpui a nih dan leh an thlen chin tawhte a tarlang bakah Lac chindan a lem nen a zirtir a. KVK Kolasib Head Dr. Michelle C. Lallawmkimi pawhin loneituten harsatna an tawhna apiangah tanpui tura an inhuam reng thu a sawi a; Scientist (AH & Vety) Dr. David Malsawmdawngliana’n lawmthu sawiin hun a khar. 

NABARD hnuaia ‘Lac Project’ tanpuina dawng tura Thingdawl Farmers’ Club Member thlan bik mi 25 hnenah hian Lac rannung (insect) khawina tur atan Semialata tiak 40,000 chuang leh Knapsack Sprayer-25, Secatuer-25, Plastic Crates-25 leh Leitha bag-75 sem nghal a ni bawk a. Hemi hnu hian KVK hotute, NABARD hotute leh loneitute chuan Semialata Nursery an tlawh bawk.

Nimin July ni 13, 2017 khan KVK Kolasib leh NABARD Mizoram bultumin Kawnpui Women Farmers’ Club din a ni a, hemichhe farmer-te tan training neih a ni nghal a. He hun hi Kolasib DC Dr. Arun.T. leh NABARD DGM Pu J.Suresh ten an hmanpui a. Kawnpui Women Farmers’ Club hi Mizorama hmeichhe farmers intelkhawmna (club) ding hmasa ber a ni nghe nghe a ni.