4734/2024-2025

Aizawl dated 20th March 2025: State Agricultural Management & Extension Training Institute (SAMETI), Agriculture & Farmers Welfare Department, Mizoram State Rural Livelihood Mission, Krishi Vigyan Kendra Aizawl leh NABARD tawngkawpin an buatsaih Namo Drone Didi Scheme zirna nikhat awh training Krishi Vigyan Kendra (KVK) Selesih, Aizawl a neih chu Pu PC Vanlalruata, Minister, Agriculture & Farmers Welfare Department chuan a hawng a. Pi Ramdinliani, Special Secretary chuan hun a kaihruai a ni.

Minister Pu PC Vanlalruata chuan hnathawhna sawt zawk leh hlawk zawka kalpui tur chuan tunlai thiamna hman tangkai thiam a pawimawh thu sawiin Sawrkar laipui ruahmanna a Namo Drone Didi scheme kaltlanga Mizorama kuthnathawktute thuam chak an ni tur chu lawmawm a tih thu a sawi a. He scheme hnuaia kuthnathawktute tihchak an nih dawn bakah hmeichhiate hmahruaitu a hman an ni tur chuan hmasawnna nasa tak a thlen ngei a beisei thu a sawi. A huhoa intelkhawma hmalakna kalpui thintu Self Help Group member-te hman tangkai an ni tur chu Pu PC Vanlalruata chuan lawmawm a tih thu sawiin he training kaltlang hian midangte zirtir thei khawp thiamna zir chhuah tum ngei turin a fuih a. Drone hmanga kuthnathawktute tha tichak tura hmalakna hian ei leh bar intodelhna kawngah leh eizawnna rintlak siamna kawnga hmasawnna nasa zawk thlentu nih ngei tum turin training petute leh training-a tel te chu a chah bawk a ni.

He hunah hian Pu Lalringliana, Joint Director, Agriculture & Farmer's Welfare Department chuan Namo Drone Didi scheme sawi fiahna leh Mizorama kalpui anih dan tur sawi zauna hun a hmang a. Dr. Zomuankima, Chief Operating Officer, MzSRLM chuan he scheme kaltlanga Mizoram district 10-a Self Help Group Cluster Level Federation hman tangkai an nih dan tur tarlanna hun a hmang bawk a ni. 'One Day Training on Drone Application in Agriculture' hawnna hunah hian Prof. Lalnuntluangi Hmar, Dean, CVSc. & AH, Selesih chuan Mizo thlalaite chu khawl thil hmanthiam leh thunun kawnga inzirthiam chak tak an nih thu sawiin Agriculture tihhmasawnna tura Drone khalh zirturte pawhin thiamna rintlak zirchhuah duhna rilru pu turin a fuih a. 'Ka thei ve a ni' tih rilru pu tlat turin a chah. Pi Lalengzami Haolai, Joint Director chuan lawmthu sawina a hmang bawk a ni. 

Tarlan danin Namo Drone Didi scheme hi Sawrkar laipui hnuaia hmalakna niin hmeichhiate kaihhruai Self-Help Group (SHG) te chu Agriculture service pe thei tura drone technology hmanga thuam a, thiamna leh theihna pek a tum a ni. November 30, 2023-a kalpui ṭan he scheme hian kum 2024 leh 2026 inkarah hmeichhe SHG thlan bik 14,500-te hnenah drone sem a tum a, heng SHG-te hian loneitute hnenah rental service a pe ang a, liquid fertilizer hmanna tura duan deuh bik a ni. He scheme hian sum lama tanpuina nasa tak a keng tel a, drone leh bungraw mamawh dang senso 80% a huam a, ₹8 lakhs thleng a huam a ni. A senso dangte chu SHG-te chuan Agriculture Infrastructure Fund (AIF) aṭangin 3% interest subvention-in loan an dil thei a ni. Loneitu thlan bikte hnena general awareness neihna atana hmalakna hmasa ber atan “Drone Application in Agriculture” chungchangah One Day Training hi buatsaih a ni.

Training ah hian MzSRLM hnuaia Aizawl, Lunglei, Champhai, Kolasib, Serchhip, Mamit, Saitual leh Khawzawl Cluster Level Federation hnuaia Self Help Group thlanchhuahte an tel a. Dr. Jotish Nongthongbam, Subject Matter Specialist, (Agriculture Engineer), KVK Aizawl hnen atangin Agriculture Drone khalh dan leh enkawl dan te practical a zir a ni.