Thingtlang khuaa cheng, in neilo leh di ina khawsa te tana in thar sakna tur leh in chhe tawh thawmthatna tura Mizoram sawrkar hmalakna pawimawh tak Chief Minister’s Rural Housing Scheme chu vawiin khan Convention Center, Lunglei-ah LAD Minister Pu PC Lalthanliana’n a hawng. He hunah hian sawrkar department hotute, tlawmngai pawl aiawhte, chanchinbu mite leh Lunglei District chhunga khawtlang hruaitu VC-te thanhnem tak an kalkhawm a ni.

Pu PC Lalthanliana chuan CM Rural Housing Scheme chu a bulthuma rawt chhuak tu leh phur pui ber tu te zinga a tel thu sawiin Lunglei District-a he Scheme hawnna programme-a a tel chu a lawm takzet thu kalkhawmte a hrilh a. CM Rural Housing Scheme chu mi harsa te dinhmun chawikang tura hmalakna pawimawh tak a nih thu sawiin kuthnathawktute leh mirethei te lam tang program hrang hrang te sawrkarin chak taka a kalpui zel tur thu a tarlang a. A phu ngei ten he tanpuina hi an dawn theih nan BDO-te leh khawtlang hruaitu VC kalhawmte chu duhsak bik neiloa dik leh felfai taka beneficiary-te thlanchhuahna kalpui turin a chah a.

He scheme pawimawh tak hawnna programme-a khawtlang rorelna kengkawhtu VC-te thahnem tak an tel chu lawmawm a tih thu sawiin LAD Minister chuan  VC-te chu thuneihna tam zawk leh sang zawk pe turin sawrkarin ruahmanna a siam mek thu a sawi a. VC-te chu kan ram hmasawnna bulthuta awm, rorel khawl pawimawh tak an nih avangin thuneihna leh mawhphurna sang zawk nei thei tura lo inbuatsaih theuh turin a chah a. VC-te chu dik tak leh a nihna tur ang taka khawtlang sum hmang  thin tura chahin LAD Minister chuan CM Rural Housing Scheme chu mi tam tak tan malsawmna a thlen ngei a rin thu a sawi bawk.

Hawnna programme hi Lunglei DC Pi Lalzarmawii, IAS in kaihruaiin kalkhawmte lawmna thu a sawi a. Pu K. Lalrohlua, PD, DRDA in Scheme sawifiahna hun a hmang bawk. He hunah hian zawhna leh chhanna hun hman niin VC-te chuan Scheme chungchang an hriat duh te zawtin sawihona hun tha tak hman a ni bawk. Dr Malsawmtluanga Fanchun, BDO Lunglei-in lawmthu sawiin hun a khar a ni.

Chief Minister’s Rural Housing Scheme hi NEDP hnuaia hmalakna niin tun dinhmunah he scheme kaltlang hian Mizorama District panga Champhai, Lunglei, Kolasib, Mamit leh Aizawl ah te in sang hnih (2000) sak tum niin beneficiary tin ten in sak nan Rs. 50,000/- theuh an dawng dawn a. Hei hi installment vawi thuma pek chhuah tur niin Lunglei District-ah beneficiary chhungkaw 619 thlanchhuah an ni ang. He Scheme hi thingtlang khua a chengte tana duan a nih angin Lunglei District chhunga Lunglei Town, Hnahthial Town leh Tlabung Town area a chhungkaw chengte a huam tel lo ang.