Vawiin khan  Assembly Annexe Buiding Conference Hall-ah Chief Minister Pu Lal Thanhawla chuan a vawikhatna atan NLUP KUTPUI chu a hawng a. Kut neih chhung hian NLUP hlawhtlinna atanga tharchhuah thlairah, thei, Bawnghnute, sa, thuamhnaw lam  leh kuthnathawktute kutchhuak thildang te Assembly Annexe Building Basement-ah man tlawm zawka hralh chhuah a ni ang a. NLUP hlawhtlinna hrang hrangte pawh hmuh theih a tarlan a ni dawn a. NLUP Kutpui hi Zirtawpni khian a tiak ang.

NLUP Kutpui chu kuthnathawktute hlawhtlinna lawmpuina a nih thu Chief Minister Pu Lal Thanhawla, Kut hawngtu chuan a sawi a. Kut hnathawktute tel loin ram a kal thei lo tih sawiin Mizoram chhunga Kuthnathawktute chawikanna tur lam hawi leh mil zawng hmalakna te chhunzawm zel a ni ang a ti. NLUP chu a tir atangin mirethei, khawsak harsa, pachhia leh hmeithaite tanpuina leh leirem an rah theihna tur atana ruahman a ni a ti a. Khawvel changkang zelah khawvel mamawh - sik leh sa chhe mek siam that, khawvel lo lum chho zel tihziaawmna tura hmalakna, pheikhairual leh hawl kim zawk hmasawnna programme te nen lam NLUP-ah a tel vek  a. Khawvela zirna thazual bik zinga mi University Of Minnesota pawhin NLUP chu tha an tih em avangin Mizoram sawrkar sawm pawh ni loin rawn telve an dil a; thawhpui an ni a Mizoram University nen pawh inremna thuthlung an ziak a ni a ti a.  NLUP hmalakna leh kalpui dan chu UNO pawh in tha a ti a, a peng pawimawh tak tak te nen Aizawlah an Office te hial hawngin Mizoram sawrkar an thawhpui mek a. Sum leh paiah pawh NLUP in hnathawhna tur sum a neih belh phah a ti a. Chung UNO peng zinga pakhat IFAD atang phei chuan hnathawna tur sum tam tham tak beisei mek a  ni a ti. Kuthnathawktute chawikanna bakah tunlai khawvel mamawh chhanna a tel kim em avangin NLUP  chu India sawrkarin pawhin  tha a ti a." Chuvangin chhungkaw 16000 tuamna tur NLUP bultanna atana mamawh sum Rs 1500 Crore Mizoram sawrkarin a dil pawh khan kan dil aia a let dawna tam mah Rs. 2813 Crore min phalsak ta hial zawk a ni", a ti.

Chief Minister Pu Lal Thanhawla chuan Mizoram chhunga mi tam zawkte chu kuthnathawktute an la nih thu sawiin chung mite  lamtang programme NLUP  chu sawrkar chuan la chhunzawm zel tha a tih thu a sawi a. Kuthnathawktute puala Kuthnathawktute Ni kumdanga hman thin pawh  kuminah chuan NLUP Kut nen hmankawp a nih tak thu leh hman chhunzawm tum a ni a ti. "NLUP a kan hlawhtlinna tam tak te hi sawngbawlna leh enkawlna tha zawk kan neih theih nan New Economic Development Programme NEDP in kan thuam chho ang tiin kan hotuten ruahmanna an nei a. Vawiin a ei tawk tawk economy atang hian market economy ah hlanchhoh kan tum a. Thalai mithiam lo pung zel te tan sawrkar hna hi a tam tawklo tih kan hria a. Skill Development leh Capacity Building huangah IIM Kolkata te nen kan thawkho a.   NEDP hnuaiah Entrepreneur Development  Scheme  hmangin kan ram innghahna tur mahni kutke a ding - entrepreneur tam thei ang ber chher chhoh zel tum in hma kan la mek a ni", a ti.

NLUP kalpui a nih atanga kum 7 kum 8 a lo tlin khan India ramah Mizoram chu state thang tha ber 4 zingah a tel tih a sawi a. NITI Aayog tehnaah Mizoram GSDP chu a sang tha hle tih leh NLUP hmalakna chu Mizoram hmasawnna atana thawhhlawk ber pakhat a ni a ti. Ministry of Finance chhutlawk dan phei chuan Mizoram GSDP pun lehna tur chu digit-mal ni tawh lo in digithnih a ni chho tura ngaih a ni a ti a. Mizoram State chhunga cheng mi pakhatin kum 1 chhunga a thawhchhuah zat sum chu India ram pum huap aiin a sang chho char char tawh a. " India ramah dinhmun sang tak leh state hmasawn a kan awm theihnaah ram mipui - kuthnathawktute leh sawrkar hnathawkte tanlakna a ni tih kan hria an zavaia chungah lawmthu ka sawi a. Kan tan chhoh zela, tun aia hlawhtlinna nasa zawk kan neih kan duh a, chumi atan chuan theihtawp kan chhuah zel dawn a. NLUP Kut pawh kuthnathawktute hlawhtlinna hriatpui leh lawmpuina kut anih angin mipui ten kan hluta, kan hlimpui kan beisei a ni", a ti.

NLUP KUTPUI hawnna inkhawm hi NIB Chairman Pu JH Rothuama, MLA in a kaihruai a. NIB Vice Chairman Pu PL Thanga'n NLUP Kut buatsaih a nih dan chungchang sawi zauna a nei a. State Planning Board Vice Chairman Pu H.Liansailova pawhin in thusawina hun a hmang bawk a ni.

He hunah hian NLUP lehkhabu " Sustainable Land Use Initiatives in Mizoram" chu a chhunga inziak tlangpui sawihawnna Dr.James LT Thanga, Asst Professor, MZU in a neih hnuah Chief Minister Pu Lal Thanhawla'n a tlangzarh a; Chief Minister chuan NLUP Kutpui hriatrengna Lukhum a tlangzarh leh a. NLUP Kutah Minister te, MLA te, Official te leh Kuthnathawktute an tel tha hle a ni. NLUP Kutpui hawnna hi Assembly Annex Conference Hall-a neih a nih hnuah Chief Minister Pu Lal Thanhawla chuan NLUP Kut a dawr inhawngte a fang kual a; NLUP Kutah hian dawr 100 chuang zet NLUP Line Department 10 hnuaia kuthnathawkte leh hmalatuten an hawng a ni.