Vawiin khan Kolasib Bawrhsap Pisa Pindan ah North Eastern Electric Power Corporation Ltd.(NEEPCO) chuan Bawrhsap kaltlangin MJA Press Club sak chhunzawmna tur cheng nuai 10 pek chhuahna lehkhapuan (Cheque) chu Kolasib MJA President Pu R.Lalhmingthanga kutah an hlan.
Hlanna thutkhawmah hian Bawrhsap chuan MJA te chu a lawmpui thu sawiin Press Club sak chhunzawmna tura Sum an hmuh chu mipui leh khawtlang tana an rawngbawlna kawngah an tangkaipui ngei a beisei thu a sawi bawk a , NEEPCO te inphalna chu fakawm tiin an hmalakna zarah Mizoram chuan kawlphetha ah hma a sawn ngei a beisei thu a sawi bawk a ni.
Dr.PK Saikia Dy.Manager NEEPCO chuan MJA te tana an luangchhuak thei chu lawmawm a tih thu a sawi a, ram hmasawnna tehfung atan kawngpui, kawlphetha, tui, zirna in leh hmasawnna ruhrel hrang hrangte chu thil pawimawh tak an ni a, chung zingah chuan NEEPCO in kawlphetha pek chhuahna kawngah theihtawp an chhuah thu a sawi bawk ani.
Pu R.Lalhmingthanga, President, MJA, Kolasib District chuan an press club sak chhunzawmna tur cheng nuai 10 an pek avangin NEEPCO hotute chungah lawmthu a sawi a, hemi hlawhtlin nan a theihtawp chhuahtu MJA hrauitu hmasa/hlui te chungah lawmthu a sawi bawk a, an sum hmuh chu a hmanna tur diktaka an hman tur thu a tarlang bawk a ni. NEEPCO te inphalna chu Company dang te tan pawh thil entawntlak tak a nih thu sawiin Khawtlang hmasawnna turin Company hrang hrang Mizorama hmasawnna hna rawn thawkte chu an luanchhuah a pawimawh thu a sawi bawk.
NEEPCO chuan MJA Press Club sak chhunzawmna tur cheng nuai 10 hi Special Grant atanga an pek thu an tarlanga, hemi bakah hian Swachh Bharat tih hlawhtlin nan an Company Fund atangin Vairengte a Bus Stand leh Bazar ah Litre 100 dawng bawlhhlawh bawm 15, Enna in Orphanage Home Kolasib leh Hostel for Blind Kolasib te tan Water Cooler cum Filter , Bairabi Rel Station ah Litre 80 dawng Water Cooler cum Filter bakah Vairengte Community Health Centre tan Litre 80 dawng Water Cooler cum Filter te chu karleh maia an pekchhuah tur thu an tarlang bawk a ni.
