Vawiin chawhma dar 11:00 khan District Local Administration Department leh State Institute of Rural Development & Panchayati Raj  (SIRD&PR) tangkawp buatsaihin ni hnih awh tur Lunglei District Village Council Conference cum Panchayat Sammelan chu Convention Center-ah neih a ni a.  LAD Minister leh Lunglei North Assembly Constituency bialtu MLA ni bawk Pu PC Lalthanliana chu khuallian niin Pu Chalrosanga Ralte, Lunglei West bialtu MLA chu khualzahawm a ni. He hunah hian sawrkar department hotute bakah Lunglei District chhunga khawtlang hruaitu VC-te leh tlawmngaipawl aiawh thanhnem tak an kalkhawm a ni. 

Pu PC Lalthanliana chuan khawtlang hruaitu VC-te chu Zoram hmasawnna bulthuta awm, rorel khawl pawimawh an nih avangin ram hmasawnna hna chak taka kalpui tur chuan VC-te an pawimawh hmasa ber a ni, a ti a.  Khawtlang hruaitu VC kalkhawmte hnenah fuihna thu sawiin Minister chuan “Rorelna dik leh fel in kenkawh chuan ram pumin a sawtpui dawn a ni” a ti. Minister chuan VC-te chu thuneihna tam zawk leh mawhphurhna sang zawk pe turin sawrkarin ruahmanna a siam mek tih sawiin ramchhung State hrang hranga Panchayati Raj System inrelbawl dan mithiam thlanchhuah ten an zirchiang mek a, heng an zirchhuah atang hian kan ram mila hman dan tur ngaihtuah a ni dawn, a ti a. Hmasawnna hna kalpui turin vantlang hmun tha a vang thin chu pawi a tih thu sawiin Pu PC Lalthanliana chuan VC-te  chu an huamchhung theuhah vantlang ram humhalh thiam turin a chah bawk a ni.

Lunglei West bialtu MLA Pu Chalrosanga Ralte chuan District Village Council Conference cum Panchayat Sammelan chu khawtlang hruaitu VC-te tan intuaihriamna leh inrawnkhawmna hun tha tak a ni tiin kalkhawmte chuan an hlawkpui ngei theih nan duhsakna a hlan a.  VC-te chu khawtlang kaihruai tura mipuite thlan tlin an nih angin mahni khawtlang theuh thatna tura thahnemngai  taka thawk thin turin a chah a. Mipuiten an chanvo dik tak an hmuh theihna tura hma la thin tura fuihin Pu Chalrosanga Ralte chuan khawtlang mamawh apiang sawrkarah thlen thin turin a chah bawk. 

Hawnna inkhawm hi Pu Benjamin Lalzama, Addl DC Lunglei kaihruaiin kalkhawmte lawmna thu leh Village Council Conference buatsaih a nih chhan tlangpui a sawifiah a.  Pu Lalchawimawia, DLAO Lunglei District chuan lawmthu sawiin  chawhma hun a khar a ni. He hunah hian Lunglei District chhunga VC tha thlanhhuah pathum te hnenah lawmman hlan a ni a, pakhatna Salem Veng, Lunglei niin pahnihna Chanmari Veng Lunglei leh pathumna South Vanlaiphai te an ni. Conference chhung hian Village Council tinin kum kaltaa an hnathawhte mipui hmuh theih turin thlalak an pho chhuak a, chung zing atang chuan a ti thate thlang chhuakin lawmman 1 na atanga 3 na thleng pek an ni dawn bawk a ni.

Village Council Conference cum Panchayat Sammelan Technical Session-ah Pu K.T. Pakhuangte, Sr Core Faculty, SIRD&PR Aizawl, Pu. K. Lalhmingmawia, SDO, PHE(D) leh Pu R. Thanga District and Sessions Judge, Lunglei Judicial District ten thupui thlan bik hmangin zirtirna an pe dawn a. Lunglei District huamchhung VC kalkhawmte hian Pu Lalchawimawia, DLAO Lunglei kaihhruaina hnuaiah inrawnkhawmna hun an hmang dawn bawk a, Gram Sabha, faina leh  hmasawnna kawnga hma an lak dante an sawiho dawn a ni. Conference khar nan VC kalkhawmte hian ni 13 December tlaiah ruai an kil ho bawk ang.