Krismas leh kumthar vuakveta Lunglei khawpui leh a chhehvel himna leh ralmuanna chungchanga Disttrict thuneitute hmalak dan leh hmachhawp thlirhona MJA Dist. Hqrs. Lunglei huaihawtin nimin khan Zomuan Park Lunglei-ah HPC Vice Chairman Pu S. Laldingliana hovin neih a ni.

He hun hi Pu Laltlanthanga MJA Vice President Lungleiin a kaihruai a, Pu S. Laldingliana HPC Vice Chairman chuan Lunglei khawpui himna chu Department. mal emaw, Pawl pakhat maiin a tih theih a ni lova, thawhhona thatak pawl hrang hrang leh Sawrkar Department. lam te pawhin an neih a ngai a, kan tanrual a, thawh hona tha kan neih chuan Lunglei khawpui hi ralmuang takin kan siam thei dawn a ni a ti bawk.

Pu H. Lalrinpuia SDO (S) chuan Lunglei khawpui chhunga NGO hrang hrangte nen krismas vuakveta thawh hona tha zawk neihpui an tum thu leh Puak thei thil laka fihlim vengte pawh lawmman pek tura ruahmanna an siam tawh thu a sawi a.

 Lunglei SP Pu Lalthafamkima Jongte pawhin hunpui lo thleng tur atan hian chak zawka Police thuam that an nih tur thu sawiin lirthei tlan chak lutuk ven nan a danna  (barricade) pawh dah tur niin ruihtheih thil chungchangah Excise Department. te nen thawh hona tha tak duan a ni tawh a ni a ti bawk.

YMA Sub Hqrs. Lunglei aiawhin an Vice President Pu Lalrotluanga pawhin krismas leh kumthar vuakveta khawtlang a lo muanawm theihna turin Branch hrang hrangte nen in rawnin khauh lehzuala duty dan tur ruahmanna fel tak an siam tih a sawi a ni.

Nimin  meeting-ah hian DC aiawh, Dan leh thupek kengkawhtu Police leh MAP hotute, Excise Superintendent leh YMA aiawh bakah MJA Member engemawzat an tel a, rawtna leh sawihona neih nghal a ni bawk.