935/2024-2025

Aizawl 25th June, 2024 : Vawiin khan Mizoram New Capital Complex (MINECO) Secretariat Conference Hall-ah Pu C. Lalsawivunga, LAD Minister hovin The Mizoram (Village Councils) Bill 2024 chungchang ngaihtuaha thutkhawm a ni.

Meeting kaihruaitu LAD Minister chuan vawiina VC Bill 2024 chungchanga ngaihdan leh rawtna siam tura kal zawng zawngte chungah lawmthu a sawi a. Kan VC te tha tichak a, khawtlang inrelbawlna changtlung zawk kan neih theih nana an ngaihdan sawi turin a sawm a ni.

Meeting-ah hian VC te chu The Lushai Hills District (Village Councils) Act 1953 hnuaia inenkawl an la ni a, he dan hi a hlui tawh avang leh kan khawtlangin kan mamawh tawh lem loh a tam bakah thil thar belh tur leh tihdanglam tur a awm tawh avanga he VC Draft Bill 2024 hi lo irhchhuak a nih thu tarlan a ni a. VC member a hmeichhe reservation leh VC term rei zawng chungchang sawiho a ni bawk.

He draft bill, The Mizoram (Village Councils) Bill 2024 chungchang inrawnkhawmna-ah hian VC member-te tam zawng hi household based ni lovin population based a kalpui ni tawh se tih a ni. VC Secretary atan hian Sorkar hnathawk angin special recruitment awm thei se tih a ni bawk. Meeting-ah hian VC thiah hun, thiah dan leh an hnathawh tur bakah an thuneih dan tur te sawiho nghal a ni bawk.

Meeting-ah hian Pu Lalmuanpuia Punte, MLA, Advisor to CM (Political) pawhin VC Draft Bill 2024 a belh tur leh paih tur ngaihdan a thawhhlawk hle a ni.

He dan hi Assembly-in a pass hunah Municipalities, Lai, Mara, leh Chakma Autonomous District Council huam lovin Mizoram pumah hman tur a ni ang. Vawiin thutkhawmah hian member te'n ngaihdan leh duhdan an neih te sawi vek sen a nih loh avangin LAD Secretary hnenah an ngaihdante ziaka thlen a, Drafting Committee-in a khaikhawm a tan tih a ni a. Chumi atanga thla khat hnuah thutkhawm leh nise tih a ni bawk.

Vawiin thutkhawmah hian Political Party aiawh hrang hrang BJP, Congress, MNF, bakah MUP,  Central YMA, All Mizoram VC Association, khawtlang inrelbawlna lama mithiam Pensioners  aiawhte, Drafting Committee Member, LAD Secretary bakah LAD Dept. Officials te an tel a ni.