934/2024-2025

2024 Nikir thla ni 25: June ni 27, 2024 (Ningani)-a Lai Autonomous District Council (LADC) hnuaia Village Council (VC) Inthlanpui buatsaih tura Lawngtlai aṭanga hla zual (P-2) VC 53-a inthlan buaipui tur polling party 55 te chuan vawiin khan Lawngtlai DC office kawt aṭangin an duty-na tur hmun an pan.

Polling party kal chhuak turte hian DC office-a Dispatch Counter aṭangin inthlan buatsaihna tur hmanrua leh bungruate lam khawmin, an bungruate an endik fel vek hnuah an duty-na tur hmun panin an chhuak a. Polling party-ah hian inthlan huaihawttu tur Returning Officer (RO)-te, inthlan buaipuitu tur Presiding Officer (PRO) leh Polling Officer (PO)-te, venhimna hna thawk tur security-te leh lirthei khalhtute an tel a ni.

LADC hnuaiah hian VC 99 awmin, 46-Hmawngbuchhuah VC-ah chuan inthlan chuh tura endikna (scrutiny) pal tlang zo an awm loh avangin inthlan buatsaih a ni dawn lo va; 29-Saikhawthlir VC-a seat 5 awmah chuhtu 5 (INC 1 leh ZPM 4) awmin, khingtu dang an awm loh avangin inthlan buatsaih ngai lova tlinga puan an ni dawn bawk a. Heti hian VC 97-ah inthlan buatsaih tur niin, voter tam zualna VC ṭhenkhatah auxiliary polling station dah belh a nih avangin polling party 112 an awm dawn a. Inthlan hma nia thlen phakna (P-1) VC 44-a inthlan buaipui tur polling party 57 chuan naktuk khian an duty-na tur hmun an pan ve thung dawn a ni.