3211/2024-2025

Aizawl, November ni 26, 2024: Vawiin khan Minister Pu C. Lalsawivunga, Local Adminstration Department (LAD) changtu chuan All Mizoram Village Council Association (AMVCA) General Conference, Dawrpui Multipurpose Hall, Aizawl a neih chu khuallian niin a hmanpui a. Village Council member kalkhawmte chu dik leh rinawm taka ram leh hnam tana theihtawp chhuaha hna thawk turina sawm a ni.

Minister Pu C. Lalsawivunga chuan Village Council member-te chu mipui rawngbawltu an nih angin hna taima leh rinawm taka thawk turin a chah a. An kut zala hna tla te chu chak taka thawk zel turin a chah a. Sorkar laipui atanga Finance Commission Grant hmuh dan chungchang sawiin Minister chuan hun rei tak UC submit loh leh thil fello dang hrang hrang lo awmte chu chinfel a nih dan leh 2022-2023 second installment pawh release nghal a nih tur thu a sawi a. Hetihrual hian VC member te’n hna an thawh danah leh sum an hman danah muangchang thei an nih loh thu sawiin, state dangah chuan 2024-25 second installment an buaipui mek a ni a ti a. FC grant zawng zanah hi portal ah upload vek a, sorkar laipuiin in hna an thawh zawh hnu a, geo tagging hmangin a hnathawh chin vil reng a nih thu sawiin, pawisa hman dan chu a langtlang a ni a ti a. Pawisa chu account a a lo luh atangin muangchang lova thawk vat vat tur an nih thu sawiin, kan hman chak loh leh hman muan em avang te, hna kan thawh chak loh avang te in FC grant a dawt leh a kan hmuh tur hi kan hmuh tlai phah thin a ni a ti.

Hemi kaihhnawihah hian Minister chuan Rashtriya Gram Swaraj Abhiyan (RGSA) hnuaiah Panchayat Bhavan sak hna Village Council thenkhata thawh mek pawh hmanhmawh turin a chah a. Second installment thun turin office lam an inpeih thlap tawh thu a sawi a ni. Tuna hna kal mek bak hi Panchayat Bhavan tam zawk sak belhna na tur Sorkar laipui chuan a ruahman thu a sawi bawk a. LAD Minister chuan VC te bank ah Zero Balance Account hawng tura tih, la hawng lo te chu hawng thuai turin a chah bawk.

LAD Minister chuan Village Council innghahna Lushai Hills District (Village Councils) Act, 1953 chu a hunlai chuan dan tha tak ni mahse hun kal zelah ram leh khawtlang danglam zel leh hanthawh dan mil tur inkaihhruaina thar siam a hun tak thu a sawi a. He Act thlakna tur hi Drafting Committee ten uluk taka buatsaihin, mithiam hrang hrangte nen inrawnkhawmna vawi tam tak nei tawhin, tunah Law & Judicial Department ten an endik tura a kal mek thu te a sawi bawk. Village Council term pawh tawi chungchang sawiin LAD Minister chuan thutlukna an siam chhan te a sawi bawk.

He Conference hi AMVCA Sr. Vice President Pu Lallawmthanga chuan kaihruaiin N President Pu K. Lalngaizuala chuan thu a sawi bawk a. Aizawl City Local Council Association leh Lunglei Local Council Association aiawh atangin thu an sawi bawk a ni. Chawhnu lamah rorel in chhunzawm a ni.