3212/2024-2025

Saitual, the 26th November, 2024:  Vawiin chawhnu dar 2:00 khan Sawrkar laipuiin Tribal-te hmasawnna leh hamṭhatna tura a ruahman PM DAJGUA pual Information, Education & Communication (IEC) Campaign kharna hun chu DC Conference Hall, Saitualah hman a ni a, District Bawrhsap Dr. Lalngura Tlau chu khuallian niin he hun hi a hmanpui.

Dr. Lalngura Tlau chuan kalkhawmte hnenah lawmthu sawiin, PM DAJGUA atan Saitual district chhunga khaw 40 zingah khaw 32 an rawn thlang chu an vannei hle tih a sawi a. Bawrhsap chuan department 17 hnuaia scheme hrang hrangte indaihlohna phurhrukna (gap filling) tur a nih avangin line department te chu thawhpuiah a sawm a, ruahmanna tha leh felfai an neih theih nan hma la turin a ngen nghal a ni. IEC Campaign tluang taka an neih theih nana hma latu department hotute zawng zawng chungah Bawrhsap chuan lawmthu a sawi a, a tirah rah chhuak lo angin lang mahse he scheme hi hmasawnna rah tha tak thlentu a nih a beisei thu a sawi bawk a ni.

PM DAJGUA IEC campaign hi November ni 15, 2024 khan neih tan niin campaign hun chhung hian activity hrang hrang buatsaih a ni a, Saitual khaw chhungah te scheme chungchang ziahna lehkhate sem a ni a, school hrang hrangah drawing competition leh essay writing competition-te buatsaih a ni.

PM DAJGUA hnuaiah hian Line Department 17 an awm a, a hnuaiah hian sawrkar laipui scheme 25 (PMGSY, JJM, PMAY (G) etc ) te khaikhawm a ni. He scheme hi scheme danga hnathawh zawh loh te thawh kimna tur a ruahman a ni a. Mizoramah chuan Social Welfare & Tribal Affairs Department chu Nodal Department an ni a. He scheme hnuaia hmalakna te hi uluk taka vil leh en zui tur niin, District leh Block Level-ah Committee din a ni a, PM Gati Shakti Portal-ah hnathawh zawng zawng te hi upload vek a ni dawn a ni.

PM DAJGUA IEC Campaign kharna hun hi Pu Lalthakima, SDO (S) chuan a kaihruai a District Level committee on DAJGUA member te kalkhawmin, Pu V. Laldinsanga, DRDO chuan lawmthu sawinain hun a khar a ni.