3213/2024-2025

Dated Aizawl, the 26th November, 2024: Vawiin chawhnu dar 2:00 khan Dharti Aaba Janjatiya Gram Utkarsh Abhiyan (DAJGUA) IEC Campaign Programme kharna leh India ram danpui pian champha phak vawi 75 lawmna hun chu State Tribal Resource & Training Centre (TRI), Kelsih-ah neih a ni a. Pu Lalthansanga, Hon'ble Minister, Environment Forests & Climate Change chuan he hun hi khuallian niin a hmanpui a, TRI Mizoram YouTube channel a tlangzarh bakah, Padma Shri Awardee-te hnenah chawimawina thilpek a hlan nghal bawk a ni.

Khuallian Minister Pu Lalthansanga chuan kalkhawmte hmaah hian Padma Shri Awardee-te fuihna leh Department hmalakna a hmuh dante a sawi a. STRTC YouTube channel chu mipuite'n an tangkaipui ngei a rin thu sawiin, technology nena tangkawpa Department-in hma lak a tum chu lawmawm a tih thu a sawi a. Padma Shri Awardee-te chu India ram pum ang leh khawvel pum ang pawha min chawisanga Mizote hnam anga min tarlangtu an nih thu sawiin, mahni kawng zawh theuhah mi bik ni tura an inpekna leh an kawng zawhte chu ropui a tih thu a sawi a. Thangtharte tana entawn tur sulhnu tam tak hnutchhiah turin duhsakna a hlan nghal bawk a ni.

Vawiina hun hman hi Pi Lalzarmawii, IAS, Commissioner&Secretary, SWATA & WCD chuan kaihruaiin kalkhawmte lawmna thu leh DAJGUA Mission chungchangte a sawi a. STRTC/TRI YouTube Channel tlangzarh nghal niin, Mizote zinga Padma Shri Award lo dawng tawh, tribal achiever-te hnena chawimawina thilpek hlan  a ni a. Pi Zonunthari, Jt. Secretary, SWATA &WCD chuan lawmthu sawiin hun hi a khar a ni.

Mizote zinga Padma Shri Awardees vawiina chawimawina thilpek dawngte chu:-

1. Dr. C. Lalhmingliana (2003, Social Work)

2. Dr. Laltluangliana Khiangte (2006, Literature & Education)

3. Lalthangfala Sailo (2009, Literature & Education)

4. R.L. Thanmawia (2012, Literature & Education)

5. C. Kamlova (2020, Literature & Education)

6. Lalbiakthanga Pachuau, (2020, Literature & Education)

7. B. Sangkhumi (2021, Social Work).

8. K.C. Runremsangi (2023, Art).