3214/2024-2025

Aizawl the 26th November, 2024 : Mizoram mipuiten boruak tha tak hnuaiah Krismas leh Kumthar lawmna hun an hman theih nan Sawrkar chuan halpuah leh halmawi hal, zawrh leh lakluh a khap tlat a. State khawpui ber, Aizawl-ah pawh he hunpui hi boruak tha tak hnuaiah hman a nih theih nan dankalha halpuah leh a kaihhnawih zuarte dap hna ngawrh takin kalpui a ni. SP, Aizawl District hnuaia Police Station ten an area chhung theuha dawr leh sumdawnna hmun bakah courier service-te dan kalha halpuah leh a kaihhnawih dan phal loh thil an zawrh leh zawrh loh ngawrh takin an enfiah a ni.

Aizawl District Police-te hmalakna kal zelah ni 23.11.2024 khan Khatla atangin halpuah leh halmawi chi hrang hrang box 3 Pi Lalrinfeli w/o Lalramngaia, College Veng, Aizawl hnen atangin man a ni a, tin, ni 25.11.2024 khan P & Sons building, Dawrpui atangin halpuah leh halmawi thahnem tak Sahidul Alam S/o Kamar Uddin, Karimganj Assam kut atangin man a ni bawk a, heng mi pahnihte lakah hian Aizawl Police Station-ah thubuai ziahluh a ni. Halpuah leh halmawi mansak hlut zawng hi Rs.9,10,371/- a ni. Ni 25.11.2024 vek hian Lalthawmmawia S/o Lalrosanga, Chawlhhmun kut atangin halpuah leh halmawi thahnem tak Rs. 1,20,000/- hu man niin, Vaivakawn Police Station-ah thubuai ziahluh bawk a ni. Tunhnaia halpuah leh halmawi man zawng zawng hlut zawng hi Rs. 10,32,571/- a ni.

SP, Aizawl chuan sawrkarin dan a siamte ngai pawimawh a zawm theuh turin mipuite a ngen a. Krismas leh Kumthar boruak tha tak hnuaiah kan hman theih nan danin a khap halpuah leh a kaihhnawih lam chi reng reng leilo  leh hal lo turin a ngen a ni. Tin, hetiang dan phal loh thil lalut leh zuar an awm leh awm loh enfiah hna hi ngawrh takin a kalpui zel dawn a, dan bawhchhia mante chu dan angin an chungah action lak zel a ni ang.

ISSUED BY SUPERINTENDENT OF POLICE, AIZAWL DISTRICT, AIZAWL